نوێنەری حکوومەتی ھەرێمی کوردستان لە یەکێتیی ئەوروپا گوتی، ئەمڕۆ ئەنجومەنی ئەوروپا ستراتیژیی خۆی لەبارەی عێراقەوە پەسەند کرد، کە تێیدا پشتگیری لە قەوارەی ھەرێمی کوردستان دەکات، ئەمەش پشتگیرییەکی سیاسی و نێودەوڵەتییە بۆ ھەرێمی کوردستان.

ئەمڕۆ ئەنجومەنی ئەورووپا ستراتیژیی خۆی لەبارەی عێراقەوە پەسەند کرد و ئەو بڕیارەی پەسەندی کردووە ستراتیژیی ئەوروپا دەبێت بۆ داھاتوو لەبارەی عێراقەوە، کە بە ناوی ٢٧ وڵاتی ئەندام لەو یەکێتییەیە و تێیدا گرنگییەکی زۆر بە ھەرێمی کوردستان دراوە.

لەم بارەیەوە، دلاوەر ئاژگەیی، نوێنەری حکوومەتی ھەرێمی کوردستان لە یەکێتیی ئەوروپا بە ماڵپەڕی فەرمیی پارتی دیموکراتی کوردستانی ڕاگەیاند: "ئەمڕۆ ئەنجومەنی ئەوروپا ستراتیژیی خۆی لەبارەی عێراقەوە پەسەند کرد، لە خاڵی پێنجەمی ستراتیژییەکەدا یەکێتیی ئەوروپا پشتگیری لە دانوستانی نێوان ھەرێم و بەغدا دەکات و داوای جێبەجێکردنی تەواوی دەستووری عێراق دەکات."

دلاوەر ئاژگەیی گوتی: "لە ستراتیژیی ئەنجومەنی ئەوروپادا جەخت لەسەر قەوارەی ھەرێمی کوردستان کراوە لە چوارچێوەی دەستووری عێراقدا و داوای ڕێککەوتنی نێوان ھەرێم و بەغدا دەکات بە جۆرێک ھەردوولا لێی سوودمەند بن."

لەبارەی گرینگیی ئەو بڕیارەوە، نوێنەری حکوومەتی ھەرێمی کوردستان لە یەکێتیی ئەوروپا ڕوونی کردەوە: "ئەمە زۆر گرینگیی بۆ ھەرێمی کوردستان ھەیە، چونکە پشتگیرییەکی سیاسی و نێودەوڵەتییە بۆ ھەرێمی کوردستان."

ئاژگەیی دەڵێت: "لەو ستراتیژییەدا باس لەوە کراوە پێویستە شەراکەت لە نێوان ھەرێم و بەغدا ھەبێت و گرینگییان زۆر بە ھەرێمی کوردستان داوە، کە ئەمە ھەڵوێستی تازەی یەکێتیی ئەوروپایە بەرامبەر بە ھەرێمی کوردستان و ئەوەی پەسەند کراوە، ستراتیژیی داھاتووی ئەوروپایە بە ناوی ٢٧ دەوڵەت، کە ئەندامن و ھەرێمی کوردستانیش بەشێکی گرینگی ئەو ستراتیژییەیە."

ئاژگەیی باسی لەوەش کرد: "بەغدا ئەگەر ھات و پشتی لە ھەرێمی کوردستان کرد و دژایەتیی ھەرێمی کرد، خۆی لە چوارچێوەی ئەو ستراتیژییەدا نابینێتەوە، بۆیە ئەمە دەبێتە پشتگیرییەک بۆ سەرخستنی دانوستانی نێوان ھەرێم و بەغدا لەبارەی ھەموو کێشەکانەوە، لەوانە ماددەی١٤٠ و بەشە بودجەی ھەرێم و پرسەکانی دیکەش."
kdp-