سەرۆک بارزانی پەیامێک بەبۆنەی هێرشی سوپای تورکیا بۆ سەر شاری عەفرین لە رۆژئاوای کوردستان بڵاو دەکاتەوە.

لە پەیامەکەدا، کە رۆژی دووشەممە 22/1/2018 بڵاو کراوەتەوە و سەرۆک مەسعود بارزانی رایدەگەیەنێت، کە نیگەرانە بە گیان لەدەستدانی هاووڵاتییانی عەفرین لە ئەنجامی هێرش و بۆردومانی ”سوپای توركیا و چەند لایەنێكی تر“.

سەرۆک مەسعود بارزانی هیوای خواستووە هێرشی سوپای تورکیا بۆ سەر عەفرین ”بە زووترین کات“ بووەستێندرێن بۆ ئەوەی شەڕەکە تەشەنە نەکات و ”دەرەنجامی خراپی لی نەکەوێتەوە“.

سەرۆک بارزانی داواش دەکات بە رێگا چارەی ئاشتییانە کێشەکان چارەسەر بکرێن، چونکە ”بەپێی هەموو ئەزموونەكانی ناوچەكە، بە شەڕ و توندوتیژی قەیران و كێشەكان قووڵتر و فراوانتر دەبن“.



دەقی پەیامەکەی سەرۆک بارزانی:



پەیامی سەرۆك بارزانی لەبارەی هێرشەكانی سەر شاری عەفرین



بەناوی خودای بەخشندە و میهرەبان


بە هێرش و بوردمانەكانی سوپای توركیا و چەند لایەنێكی تر بۆ سەر شاری عەفرین و گیانلەدەستدان و قوربانیبوونی خەڵكی سڤیلی ئەو شارە زۆر نیگەرانین.

هیوادارین بە زووترین كات ئەو پەلامارانە ڕاوەستن و گیانی هاووڵاتیان پارێزراو بێت و چیتر لەوە زیاتر تەشەنە نەكات و كارەسات و دەرئەنجامی خەراپی لێ نەكەوێتەوە. بەپێی هەموو ئەزموونەكانی ناوچەكە، بە شەڕ و توندوتیژی قەیران و كێشەكان قووڵتر و فراوانتر دەبن. باشترین ڕێگە ئەوەیە بە شێوازی ئاشتیانە چارەسەری قەیران و كێشەكانی ناوچەكە بكرێت.


مسعود بارزانی


22ـی 1ـی 2018









باسنيوز