بەڕێوەبەری پلاندانان لە وەزارەتی تەندروستی حکومەتی ھەرێم رایگەیاند، ئەمڕۆ لیژنەیەک بۆ وردبینیکردنی موچەی وەزارەتەکانی تەندروستی و پەروەردە لە بەغداوە دێتە ھەرێمی کوردستان.

ڤیان جاف، بەڕێوەبەری پلاندانان لە وەزارەتی تەندروستی حکومەتی ھەرێم و ئەندامی لیژنەی وردبینی لیستی موچە، بەخەندان-ی راگەیاند، لیژنەی وردبینی مووچە لە بەغداوە دێتە ھەرێمی کوردستان بۆ وردبینیکردن لە موچەی وەزارەتەکانی تەندروستی و پەروەردە.

ھاتنی لیژنەی وردبینیکردنی موچە لە بەغداوە دوای ئەوە دێت کە پێشتر لیستی موچەی وەزارەتەکانی تەندروستی و پەروەردە رەوانەی بەغدا کرابوون بۆ وردبینیکردن.

تائێستا پرۆسەی وردبینی لیستی موچەخۆرانی ھەرێمی کوردستا کۆتایی نەھاتووەو سەرۆک وەزیرانی عێراق، پێشتر رایگەیاندبوو، ئامادەن موچەی ھەردوو وەزارەتی تەندروستی و پەروەردە خەرج بکەن دوای پرۆسەی وردبینی.

پێشتر سەرچاوەیەک لە وەزارەتی دارایی حکومەتی ھەرێمی کوردستان، پێشتر بەخەندان-ی راگەیاندبوو، 450 ملیار دینار لە بەغداوە خراوەتە سەر ژمارە بانکی ھەرێمی کوردستان.

لە ئێستادا پەیوەندییەکانی نێوان ھەرێم و بەغدا بەرەو ئاسایی بوونەوە دەچێت، ئەوەش دوای ئەوەی ھەرێم پابەندبوونی خۆی بەبڕیارەکانی دادگای فیدڕاڵییەوە راگەیاند، ھاوکات چەند کۆبوونەوەیەک لەنێوان ھەردوولادا بەڕێوەچووە، دیارترینیان کۆبوونەوەی نێچیرڤان بارزانی و حەیدەر عەبادی بوو لە 20ی ئەم مانگەدا لە بەغدا.




خەندان