هەرچەندە بڕیار بوو ئەمڕۆ دووشەممە، لەلایەن ئەنجومەنی داكۆكی مافی خەڵك، لەناو شاری هەڵەبجە خۆپیشاندانێكی جەماوەری بەڕێوە بچێت، بەڵام بەڕیوەبەرانی ئەو ئەنجومەنە رای دەگەیەنن بەهۆی بوونی هەولێک بۆ بەلاڕێدابردنی خۆپیشاندانەكە، بڕیار درا بەڕێوە نەچێت.


بەڕێوەبەرانی ئەنجومەنی داكۆكی مافی خەڵك لە هەڵەبجە، ئەمڕۆ دووشەممە 25/12/2017، لە كۆنگرەیەكی ڕۆژنامەوانیدا لەسەر مەزاری شەهیدانی هەڵەبجە، ڕایان گەیاند: "چەند ڕۆژێكە لە ئامادەكاری داین بۆ ئەنجامدانی خۆپیشاندانی جەماوەری و چەندین ئەندام و چالاكوانی مەدەنیش دەستگیر كران و هەر سووریش بووین لەسەر ئەنجامدانی چالاكییەكانمان، بەڵام هەوڵی بە لاڕێدابردن و خۆێناویكردنی خۆپیشاندانەكان لەلایەن ستاف و باڵەكانی حزبێكی دیاریكراوەوە، دوودڵیی لەلا دروست كردین".

ڕوونیان كردەوە و ئەوەشیان خستە ڕوو: "بۆیە لەژێر ئەم بارە نالەبارە و سەپاندنی حكوومەتی عورفیدا لەپێناو نەڕشتنی خوێنی خەڵكی سڤیل و لەكەردارنەكردنی ناوبانگی پایتەختی ئاشتی بە باشمان زانی لەبری ئەوەی لە ڕێگەی خۆپیشاندانەوە هەڵوێستەكانمان بگەیەنین، لە ڕێگەی ئەم پەیامەوە داواكانمان بۆ خەڵكی هەرێمەكەمان و بەتایبەت پارێزگای هەڵەبجە بخەینە ڕوو".

بەریوەبەرانی ئەنجومەنی داكۆكی مافی خەڵك لە هەڵەبجە، ڕاشیان گەیاند: "ئیدانەی سووتاندنی دامودەزگای حكوومی و بارەگا حزبییەكان و بە كولتووركردنی سووتاندن دەكەین ".













باسنيوز