بەڕێوەبەری ئاسایشی داقوق ڕای دەگەیەنێت، کە میلیشیاکانی حەشدی شەعبی لە سنووری شارۆچکەی داقوق دوو ھاووڵاتیی کوردی کاکەیی دەڕفێنن.



فاروق ئەحمەد، بەڕێوەبەری ئاسایشی داقوق ڕاگەیاند، چەکدارانی حەشدی شەعبی شەوی یەکشەممە 24/12/2017 هەڵیان کوتاوەتە سەر گوندی عەرەب کۆی، کە گوندێکی کوردانی کاکەییە و دەستدرێژییان کردووەتە سەر ژمارەیەک گەنجی ئەو وڵاتە.



هاوکات چەکدارانی ئەو میلیشیایانە دوو هاووڵاتیی کوردی کاکەییان بە ناوەکانی ئەحمەد رۆستەم محەمەد و نور بەهجەت موبارەک رفاندووە و چارەنووسیان نادیارە.



ڕۆژی ١٦ی ئۆکتۆبەری ڕابردوو، میلیشیاکانی (حەشدی شەعبی، سوپای پاسدارانی ئێران و حزبوڵای لوبنانی) بەڕێککەوتن لەگەڵ گرووپێکی خیانەتکار، پەلاماری کەرکووک و خورماتوو و خانەقینیان دا و دەستیان بە سەردا گرت و سەدان ھاووڵاتیی کوردیان شەھید و بریندار کرد و نزیکەی ٢٠٠ ھەزار کەسیش لەو سنوورانە ئاوارە بوون.



ڕۆژی ١٨ی ئۆکتۆبەری ڕابردوو، کۆسرەت ڕەسول عەلی، جێگری سکترتێری گشتی یەکێتی لە پەیامێکدا ڕای گەیاند: "ئۆباڵی کارەساتەکانی کەرکووک و خورماتوو لە ئەستۆی کاڵفامەکانی ناو یەکێتی دایە".



باسنیوز