سەرۆکی لیژنەی یاساییی پەرلەمانی کوردستان ئاشکرای کرد، ئەوەی لە چەند ڕۆژی ڕابردوودا بە ناوی خۆپێشاندانەوە لە ھەندێ ناوچەی ھەرێمی کوردستان ڕووی دا لە چوارچێوەی یاسا دەرچووە و دەشڵێت، پێویستە حکوومەت و دەسەڵاتی دادوەری ڕێکاری یاسایی بگرنە بەر و ڕێگە نەدەن زیان بە ھیچ کەس و لایەنێک بکەوێت.

دوای ئەوەی لە ڕۆژی دووشەممەی ڕابردووەوە لە ژمارەیەک ناوچەی ھەرێمی کوردستان خۆپێشاندان کرا و دواتر خۆپێشاندانەکان گرژییان تێکەوت و زیانی ماددی و گیانیی لێ کەوتەوە، وەک سەرۆکی لیژنەی یاساییی پەرلەمانی کوردستان، (د. ڤاڵا فەرید) ڕوونی کردەوە، دەچێتە خانەی تاوان و یاسایی نەبووە.

(د. ڤاڵا فەرید) بۆ ماڵپەڕی فەرمیی پارتی دیموکراتی کوردستان دەڵێت: "یاسای خۆپێشاندان لە ھەرێمی کوردستان ھەیە و بە پێی ئەو یاسایە ھەموو خۆپێشاندان و گردبوونەوەیەک ڕێکخراوە، پێویستە خۆپێشاندانەکان لە چوارچێوەی ئەو یاسایەدا ڕێک بخرێن، ئەوەی بە ناوی خۆپێشاندانەوە لە دوو ڕۆژی ڕابردوودا ئەنجام دراوە لەوەی ھەڵکۆتانە سەر بارەگای حزبی و فەرمانگەکانی حکوومەت و شوێنە گشتییەکان و زیانگەیاندن بە ھەرکەس و لایەنێک بەپێچەوانەی یاسا دادەنرێت و دەچێتە خانەی تاوانەکانەوە."

سەرۆکی لیژنەی یاسایی ئاماژەی بۆ ئەوەکرد: "ئەوەی ڕووی دا لە چەند ڕۆژی ڕابردوودا خۆپێشاندان نەبوون، چونکە لە یاسا دەرچوونە و پابەندی یاسا نەبوونە بۆ ئەوەی وەک مافێکی مەدەنی و یاسایی ڕێک بخرێت، ھەموو پەرلەمان دەتوانێت بە حکوومەت بڵێ پێویستە یاساکان وەک خۆی جێبەجێ بکرێن و دەسەڵاتی دادوەری و داواکاری گشتی دەبێت لە مافی گشتی بپرسێتەوە، داواکاری گشتی بەرگری لە مافی گشتی و ھاووڵاتییانی زەرەرمەند بکات."

لەبارەی کۆبوونەوەی پەرلەمان لەسەر خۆپێشاندانەکانی ڕۆژانی ڕابردوو، دکتۆر (ڤالا فەرید) گوتی: "ھێشتا پەرلەمانی کوردستان بڕیاری نەداوە لەبارەی ڕەوشی ئێستا و خۆپێشاندانەکان کۆ ببێتەوە، بەڵام لە حەفتەی دابێ کۆبوونەوەی پەرلەمان دەکرێت و لەو کۆبوونەوەیەدا پێشبینی دەکەم باس لە ڕەوشی خۆپێشاندانەکانیش بکرێت."
kdp-