فڕۆکە جەنگییەکانی هاوپەیمانان ژمارەیەک بارەگای میلیشیایەکی شیعەمەزهەبی سەر بە کۆماری ئیسلامیی ئێرانیان بۆردومان کرد.



بەپێی هەواڵی میدیا عەرەبییەکان، بۆردومانە ئاسمانییەکە سەرلەبەیانیی رۆژی چوارشەممە 20/12/2017 لەلایەن فڕۆکەکانی هاوپەیمانیی عەرەبی بۆ گەڕاندنەوەی شەرعییەت بۆ یەمەنەوە کراوەتە سەر ژمارەیەک ئامانجی حوسییەکانی یەمەن.



فڕۆکە جەنگییەکان چەند بارەگایەکی حوسییەکانیان لە باشووری سەنعای پایتەخت و شاری سەعدە بۆردومان کردووە.



هاوپەیمانیی عەرەبی لەلایەن سعودیەوە سەرۆکایەتی دەکرێت و دژی داگیرکردنی یەمەن لەلایەن حوسییەکان و بۆ گەڕاندنەوەی حکوومەتی شەرعیی یەمەن، پێکهێندراوە.



حوسییەکان میلیشیایەکی چەکداریی شیعەمەزهەبن. لەلایەن کۆماری ئیسلامیی ئێرانەوە پاڵپشتیی سەربازیی و دارایی دەکرێن.


باسنیوز