كارگێڕێکی لقی ٢٢ی پارتی دەڵێ، بڕیارە لە سەعات ٨ی ئەمشەوەوە هاتوچۆ لە کفری قەدەغە بکرێ، کادیرانی پارتیش ئامادە نین بارەگاکانیان چۆڵ بکەن.

(ڕەھێڵ جاف)، کارگێڕی لقی ٢٢ی گەرمیانی پارتی بە ماڵپەڕی فەرمیی پارتی دیموکراتی کوردستانی ڕاگەیاند: "خۆپێشاندەران ھەوڵێکی زۆریان داوە بارەگای ئێمە لە قەزای کفری بیسووتێنن و گەیشتوونەتە بەردەم بارەگای ناوچە و خاڵی پاسەوانەکانیان سووتاند، بەڵام کادیر و پێشمەرگەکانی پارتی مردنیان ھەڵبژارد و ئامادە نەبوون بارەگاکەیان چۆڵ بکەن، لەبەر ئەوە سەرەڕای فشارێکی زۆری خۆپێشاندەرانی کفری، ھێشتا بارەگای ئێمە ئاوەدانە و لە لایەن ھەڤاڵانەوە دەپارێزرێت."

لەبارەی ناوچەکانی دیکەی گەرمیانەوە، بەرپرسەکەی پارتی ئاماژەی بۆ ئەوە کرد: "لە نێو سەنتەری کەلار ھیچ ھێرشێک نەکراوە، بەڵام لە دەربەندیخان دوێنێ ھەوڵ درا ھێرش بکرێتە سەر بارەگای پارتیمان و ئەویش نەسووتاوە."

(ڕەھێڵ جاف) دەشڵێت: "لە قەزای کفری بە بڕیاری قایمقام و لیژنەی ئەمنی لە سەعات ھەشتی ئەمشەوەوە ھاتوچۆ قەدەغە کراوە، ئەوەش وەک ڕێکارێک بۆ پاراستنی شارەکە و کۆنتڕۆڵکردنی ڕەوشی کفری. ئێمە داوامان لە لیژنەی ئەمنی و لایەنی پێوەندیدار کردووە ئەرکی پاراستنی بارەگاکانمان لەئەستۆ بگرن و نەھێڵن خەڵکێک بە ناوی خۆپێشاندانەوە ھێرش بکاتە سەر بارەگای حزبی."
kdp-