ئەندامەکا پەرلەمانێ عیراقێ راگەھاند، نێزیکی 1500 ئافرەت و زارۆکێن داعش ل تلکێف ھاتبوونە دەستەسەرکرن و پتریا وان د بیانی نە و ھەمی بۆ بەغدا ھاتینە رەوانەکرن و کەس ل وێرێ نەما و گۆت: سێ وەلاتێن ئەورۆپی خواستینە زارۆکێن خێزانێن داعش یێن وەلاتێ وان بھێنە ڤەگۆھاستن.



ئەشواق جاف، ئەنداما لیژنا مافێ مرۆڤی ل پەرلەمانێ عیراقێ، دیار کر، ھژمارەک ژ وان خێزانێن زیندانیێن داعش د بیانی بوون و نە خەلکێ عیراقێ بوون، ھەمی ژی کو پتر بوون ژ 1500 ئافرەت و زارۆکان ل چاکسازیا تلکێف ھاتبوونە حەواندن و بۆ چاکسازیا بەغدا ھاتنە رەوانەکرن.



ناڤبری ئاماژە دا وێ چەندێ، ل دەمێ شکەستنا داعش ل مووسل، ھژمارەکا مەزن یا خێزانێن داعش خۆ رادەستی پێشمەرگەی و ھێزێن عیراقی کربوون و ھەمی ل چاکسازیا تلکێف ھاتبوونە حەواندن و ل گۆرەی بریارا جڤاتا ئێمناھیا نێڤدەولەتی دڤێت ئەو ئافرەت و زارۆک بۆ وەلاتێن وان بھێنە ڤەگوھاستن و گۆت: "نوکە ب شێوەیەکێ بەروەخت دێ بۆ چاکسازیا بەغدا ھێنە ڤەگۆھاستن".


ئەشواق، ئاشکرا کر کو ل گۆرەی قانوونێ ئافرەت ھەمی دێ ھێنە دادگەھکرن و گەھنە سزایێ خۆ، ب تنێ دێ زارۆک ھێنە ئازادکرن و ھەر ئێک دێ بۆ وەلاتێ خۆ ھێتە ڤەگوھاستن و گۆت: "ھەتا نوکە ب تنێ وەلاتێ ئەلمانیا، رۆسیا و تۆرکیا خواستینە زارۆکێن وان بھێنە رادەستکرن".
bas news-