بەڕێوەبەری بەڕێوەبەرایەتیی مافی مرۆڤی خانەقین ئاشكرای دەكات كە میلیشیاكانی حەشدی شەعبی ڕێگایان پێ نادەن لێكۆڵینەوە لە پێشێلكارییەكانی مافی مرۆڤ بكەن.



ئەمەل فوئاد، بەڕێوەبەری بەڕێوەبەرایەتیی مافی مرۆڤی خانەقین، ڕاگەیاند: "حەشدی شەعبی، بەتایبەت گرووپی عەسائیبی ئەهلی حەق، ڕێگەمان پێ نادەن لێكۆڵینەوە لە دۆخی مافی مرۆڤ بكەین، دۆخەكەمان وەك پێشتر نییە و ئێستا گۆڕاوە، تەنانەت وەك پێشتر ناتوانین بۆ لێكۆڵینەوە لە هەندێك دۆسیە سەردانی پۆلیس بكەین".



بەڕێوەبەری بەڕێوەبەرایەتیی مافی مرۆڤی خانەقین گوتیشی: "لەبەر خراپیی دۆخی ئەمنی، ئێستا زۆربەی ئاوارەكان كە لە كەمپەكانی دەوروبەری خانەقین بوون، چۆڵیان كردووە و چوونەتە شوێنی دیکە و حەشدی شەعبی ئازاری خەڵك دەدات".



بەڕێوەبەری بەڕێوەبەرایەتیی مافی مرۆڤی خانەقین، ئەوەشی خستە ڕوو، هاوكات وەك پێشتر ناتوانین بچینە ناو خەڵك و تاوتوێی پێشێلكارییەكانی مافی مرۆڤ بكەین، تەنانەت لە خانەقین ڕەوشەكە بە شێوەیەكە خەڵك كاتێك كاتژمێر 8ی بەیانی لە ماڵ دەردەچن و دەچنە سەر كارەكانیان، ئیتر دڵنیا نین لە ژیانیان".



ڕوونیشی كردەوە، لە خانەقین ڕووبەڕووی كێشەی جۆراوجۆر بوینەتەوە و دۆخێكی مەترسیدار هاتووەتە ئاراوە، ئەمەش بەهۆی ئەوەی كە هێزەكانی ئاسایش و پێشمەرگە لە سنوورەكەمان نەماون و دۆخی ئەمنی خراپە بووە و تاوانەكانی كوشتن زیادی كردووە و هەر لەم ماویەدا سێ تاوانی كوشتن هەبووە، ئەم كردەوانەش لە بەر نەبوونی هێزەكانی ئاسایش و پێشمەرگە لە خانەقین ڕوو دەدەن، چونكە ئەوان پێشتر ڕێگەیان بە پێشێلكارییە ئەمنییەكان نەدەدا.



ڕۆژی 16ی ئۆكتۆبەری ڕابردوو، میلیشیاكانی (حەشدی شەعبی، سوپای پاسدارانی ئێران و حزبوڵای لوبنانی) بەڕێككەوتن لەگەڵ گرووپێكی خیانەت كار، پەلاماری كەركووك و خورماتوو و خانەقینیان دا و دەستیان بە سەردا گرت و سەدان هاووڵاتیی كوردیان شەهید و بریندار كرد و نزیكەی 200 هەزار كەسیش لەو سنوورانە ئاوارە بوون.








باسنیوز