بە گوێرەی ڕاپۆرتێکی شیکاریی 'ئۆرشەلیم پۆست'، میلیشیای شیعە لە عێراقدا هەڕەشەی جیددین بۆ سەر ئەمەریکا و ئیسرائیل. ڕۆژنامەکە ناوی ئەو سەرکردانە دێنێ کە ئێستا هەڕەشەیان لە ئەمەریکا و ئیسرائیل کردووە و تەنیا کوردەکانی جیا کردووەتەوە، کە هەڕەشە نین بۆ سەر بەرژەوەندیی ئەمەریکا.

ئەمەریکا لە عێراقدا لە ١٦ی ئۆکتۆبەری ئەمساڵدا پشتی لە کورد کرد و عێراقی هەڵبژارد تا ئەو کاتەی میلیشیای حەشدی شەعبی دەستیان بەسەر ناوچە کوردستانییەکانی دەرەوەی ئیدارەی هەرێمدا گرت، بەڵام وەک ژمارەیەک لە سیناتۆرەکانی ئەمەریکا پێشبینییان کردبوو، ئەمەریکا هەڵەیەکی ستراتیژیی کرد، بە دەستی خۆی نفووزی سیاسیی خۆی کەم کردەوە و ئێستایش هێزەکانیان و باڵیۆزخانەی ئەمەریکا لە عێراق لەژێر هەڕەشەی میلیشیای حەشدی شەعبیدا ڕۆژەکانیان بەڕێ دەکەن. سیاسییەکانی ئەمەریکا لە سەرووی هەموویانەوە، (مایک پێنس) کە جێگری سەرۆکی ئەمەریکایە، پێشبینی ئەوە دەکەن کە پاشەڕۆژی میلیشیاكان لە عێراق و ناوچەکەدا لەسەر جێبەجێکردنی ناوەڕۆکی ستراتیژیەتی (ترامپ) بۆ ڕووبەڕووبوونەوەی ئیران وەستاوە، ئەوان لە دوای ناساندنی قودس بە پایتەختی ئیسرائیل لە لایەن (ترامپ)ـەوە دەڵێن، ئاماژەی جێبەجێکردنی ستراتیژییەتەکەی (ترامپ) دەرکەوت.

(قەیس خەزعەلی) سەرکردەی میلیشیای عەسائیب ئەهلی حەق، کە لە لایەن ئێرانەوە پشتگیریی دەکرێت، لە تویتێکدا دەڵێت: "قودس پایتەختی فەڵەستینە." ئەو تویتەی (خەزعەلی) دوای ئەوە هات، کە سەرۆکی ئەمەریکا (دۆناڵد ترامپ)، ئۆرشەلیم/قودسی بە پایتەحتی ئیسرائیل ناساند.
(خەزعەلی) هەڕەشەی ڕاستەوخۆی لە هێزەکانی ئەمەریکا لە عێراق کرد و 'ئۆرشەلیم پۆست' دەڵێت، میلیشیای شیعە لە نێوخۆی عێراق هەڕەشە لە ئەمەریکا دەکەن.

(خەزعەلی) لە ٢٠٠٧ دەستگیر کرا، بە هۆی ئەوەی کە هێرشی کردبووە سەر هێزەکانی ئەمەریکا لە عێراق، بەڵام لە ساڵی ٢٠٠٩ ئازاد کرا.

'ئۆرشەلیم پۆست' نووسیویەتی، (قەیس خەزعەلی) لە هێرشکردنە سەر داعش لە مووسڵ و لە ١٦ی ئۆکتۆبەری ئەمساڵیش بۆ سەر کەرکووک، بەشداریی کرد و میلیشیای حەشدی شەعبی بردە نێو کەرکووکەوە.

لە ئۆکتۆبەری ئەمساڵدا لەو کاتەی کە وەزیری دەرەوەی ئەمەریکا سەردانی عێراقی کرد و ڕایگەیاند، دەبێ عێراق میلیشیاکانی نەهێڵێت و ئەو کێشەیە چارە بکات، (قەیس خەزعەلی) جارێکی دیکە هەڕەشەی لە ئەمەریکا کردەوە و گوتی، دەبێ ئەمەریکا عێراق جێ بێڵێت و بڕۆنەوە دەرەوە لە وڵات.

لە دوای گوتارەکەی (ترامپ) کە ئۆرشەلیمی بە پایتەختی ئیسرائیل ناساند، (قەیس خەزعەلی) گوتی، ئەمە سەرەتای کۆتاییپێهینانی پڕۆژەی ئیسرائیلە. هەمووان ئیسرائیل دەکوژن، پێویستە سەرجەم وڵاتانی ڕۆژهەڵاتی ناوینیش باڵیۆزخانەی ئەمەریکا دابخەن.

(موقتەدا سەدر)یش کە 'ئۆرشەلیم پۆست' بە کەسێکی خاوەن پێگەی بەهێزی نێو شیعەی عێراق ناوی دەبات، لە ٢٠٠٣ دژی ڕۆڵی ئەمەریکا لە عێراق وەستایەوە، لە دواگوتاریدا داوای لە کۆمکاری عەرەبی کردووە، دژی (ترامپ) بڕیارێکی جیهادی بدات و ئەگەر چەکدارانی شیعە لە عێراق دژی ئەمەریکا بجەنگن، ئەوا ئەو، یەکەم سەربازیان دەبێت. هەروەها ئەو، بۆچوونی وایە کە چەکدارانی شیعە دەبێ سنووری عێراق بۆ سووریا ببڕن. سەرۆکوەزیرانی عێراق، (حەیدەر عەبادی) لە گوتارێکیدا ئەوەی درکاند، کە عێراق توانای ڕووبەڕووبوونەوەی وڵاتانی دیکەی هەیە، بەبێ ئەوەی ناوی وڵاتێک ببات، کە مەبەستی ئیسرائیل بوو.

باڵیۆزی فەڵەستینیش لە بەغدا نەیشاردەوە، کە ئەو، هانی عێراق دەدات کە پشتی فەڵەستین بگرن و لێیان دەخوازێ هەرچۆنێک لە مێژوودا چوار جار قودس لە لایەن عێراقییەکانەوە ئازاد کراوە و ناوی (سەلاحەددینی ئەیووبی) هێناوە، وەهایش داوایان لێ دەکات، کە پشتی فەڵەستین بگرن.
هەڕەشەی شیعەی سیاسی لە عێراق لە سەرکردە چەکدارییەکانیانەوە تا کەسایەتییە سیاسییەکان لە ئەمەریکا بە ڕوونی دیارە، (نووری مالیکی) کە جێگری سەرۆککۆماری عێراقە و بە کەوتنی مووسڵ لە ساڵی ٢٠١٤ بۆ دەستی داعش تۆمەتبارە، ئەویش هەڕەشەی لە (ترامپ) کردووە و ڕایگەیاندووە، کە (ترامپ) بە بڕیاری ناساندنی قودس بە پایتەختی ئیسرائیل جەنگی ڕاگەیاند.

ئێستا تێکڕای میلیشیکانی شیعە و شیعەی سیاسی، هەڕەشەی جیددین بۆ سەر ئەمەریکا لە عێراق و ئیسرائیل لە ناوچەکەدا، 'ئۆرشەلیم پۆست' تەنیا کورد لە عێراقدا ناو دەبات، کە هەڕەشە نین بۆ سەر ئەمەریکا و لە پێگەی سۆشیال میدیادا سەرنج دراوە، کە کوردەکان بە بڕیاری ناساندنی ئۆرشەلیم بە پایتەختی ئیسرائیل كاردانه‌وه‌ی نه‌رێنییان نه‌بووه‌.

'ئۆرشەلیم پۆست' نووسیویەتی، لە سۆشیال میدیادا کوردەکان نووسیویانە لەو کاتەی کە کەرکووک داگیر کرا، وڵاتانی عەرەبی بێدەنگ بوون، کەچی لەسەر قودس نیگەران بوونە، کەرکووک بۆ کورد وەک ئۆرشەلیمی کوردستانە، ئێران هات و داگیری کرد، کەس دەنگی لێوە نەهات، فەڵەستینییەکان دژی ئەوە بوون، کە کورد سەربەخۆیی بە دەست بێنێت، ئێستایش دەبێ کورد دڵخۆش بێت، کە ئۆرشەلیم بە پایتەختی ئیسرائیل ناسێندراوە.

بە گوێرەی شرۆڤەکارانی سیاسی، ئێستا ئەمەریکا لە عێراقدا لە بارێکی سەختدایە و لە ژێر هەڕەشەی جیددیی میلیشیاکانی عێراقدا ڕۆژ بەڕێ دەکات، بەر لەوەی کە ئەمەریکا هیچ کاردانەوەیەکی لە دژی میلیشیای شیعە لە عێراقدا بە شێوەیەی پراکتیکی هەبێ، ئەوان خۆیان بۆ هێرشکردنە سەر بەرژەوەندیی ئەمەریکا ئامادە کردووە و شارەزایان دەڵێن، ئەو لێدوانەی (حەیدەر عەبادی) سەرۆکوەزیرانی عێراق کە ڕایگەیاند، داعش لە عێراق کۆتایی هاتووە، بۆ ئەوەیە کە بە هێزەکانی ئەمەریکا بڵێت، ئیدی ئەرکتان لە عێراق تەواو بوو و عێراق بە فەرمی جێ بێڵن.

لە ستراتیژیەتی نوێی (ترامپ)دا هاتووە، کە دەبێ میلیشیاکانی سەر بە ئێران لە تەواوی ڕۆژهەڵاتی ناویندا نەهێڵدرێن و ئێران لە ڕووی توانای سەربازی و ئابوورییەوە لە ڕۆژهەڵاتی ناویندا لاواز بکرێ، بەڵام بە شێوەیەکی کرداری ئێستا ئێران هیلالی شیعی لە تارانەوە بەرە و سووریا و تا لوبنان تەواو کردووە و هێشتا کاردانەوەی ئەمەریکا دەرنەکەوتووە.
kdp-