ئاوارەكانی خورماتوو لە هەولێر لەبەردەم بارەگای نەتەوە یەكگرتووەكان لە بەرامبەر وەڵامنەدانەوەی داواكارییەكانیان دەستیان داوەتە مانگرتن.

ئەمڕۆ چوارشەممە 6/12/2017، ئەبووبەكر عەلی، یەكێك لە ڕێكخەرانی گردبوونەوەكەی دوێنێ سێشەممە 5/12/2017، ئاوارەكانی خورماتوو، لەبەردەم بارەگای نەتەوە یەكگرتووەكان (UN) لە هەولێر ڕایگەیاند: "دوێنێ سێشەممە بەشێك لە ئاوارەكانی خورماتوو لەبەردەم بارەگای نەتەوە یەكگرتووەكان گردبوونەویەكیان ئەنجام دا و لەمەڕ ئەو تاوانكارییانەی میلیشیاكانی حەشدی شەعبی كە لە خورماتوو ئەنجامی داوە لەو گردبوونەوەیەدا چەند داواكارییەكیان ئاراستەی نەتەوە یەكگرتووەكان كرد".

ئەو هاووڵاتیەی خورماتوو گوتیشی: "پاشان بڕیارمان دا لە بەردەم بارەگای نەتەوە یەكگرتووەكان، دەست بدەینە مانگرتن تا وەڵامی داواكارییەكانمان دەدرێتەوە".

داواكاریی ئاوارەكانی خورماتوو لە نەتەوە یەكگرتووەكان بریتین لە:

1-پێكهێنانی لێژنەیەكی تایبەت بە خورماتوو بۆ لێكۆڵینەوە لە ڕووداوەكانی 16ی ئۆكتۆبەر و ڕۆژانی دواتر.

2-پێكهێنانی لێژنەیەك بۆ لێكۆڵینەوە لەو كارەستاتەی كە بەسەر دوو گەڕەكی کوردنشینی "كۆماری و ڕزگاری"ی خورماتوودا هێنراون.

3-دابینكردنی هێزێكی بێلایەنی سەر بەنەتەوە یەكگرتووەكان، بە مەبەستی پاراستنی هاووڵاتییانی شاری خورماتوو.









باسنیوز