پڕۆژە چاکسازییە ٣٥ خاڵییەکەی وەزارەتی پێشمەرگە قۆناخی باشی بڕیوە
بەرپرسی پەیوەندییەکانی وەزارەتی پێشمەرگەی حکومەتی ھەرێمی کوردستان عەمید (ھەژار عومەر) بە ماڵپەڕی فەرمیی پارتی دیموکراتی کوردستانی ڕاگەیاند: "پڕۆژەکەی وەزارەتی پێشمەرگەی حکوومەتی ھەرێمی کوردستان کە ناوی پڕۆژەی چاکسازییە لە ٣٥ خاڵ پێک دێت، دەست بە جێبەجێکردنی کراوە لە لایەن بۆردی چاکسازی کە لە وەزارەتی پێشمەرگە دروست کراوە و ھاوپەیمانانیش تێیدا بەشدارن، ئەمەش بۆ ڕێکخستنەوەی وەزارەتی پێشمەرگەیە، کە کاتی زۆری دەوێت، تا جێبەجێ دەکرێت، چونکە پڕۆژەیەکی گەورەیە کە وەزارەتی پێشمەرگە پلانی بۆ داڕشتووە".
سەبارەت بەوەی چ قۆناغێکی بڕیووە لە جێبەجێکردنی ئەو پڕۆژەیە، عەمید (ھەژار عومەر) گوتی: "ئەو پڕۆژەیە قۆناغی زۆر باشی بڕیووە لە جێبەجێکردنی و بۆردێکی بە ناوی چاکسازی دروست کراوە، بۆ جێبەجێکردنی و خولێکی مەشق و ڕاھێنان لە لایەن وەزارەتی بەرگریی بەریتانیا بۆ کراوەتەوە و مانگانە دوو جار کۆبوونەوە دەکرێت بۆ ئەوەی ھەر جارە و ئەولەویەت بۆ جێبەجێکردنی چ خاڵێک لەو ٣٥ خاڵە بێت و بڕیارە سبەینێیش کۆبوونەوەیەک لەبارەی ئەو پڕۆژەیەوە بکرێت."
)عومەر) ڕوونیشی کردەوە: "ئەو پڕۆژەیە بۆ چاکسازییە و بۆ ڕێکخستنی ھێزی پێشمەرگەیە، بۆیە کار لەسەر ھەموو خاڵەکان دەکرێت."
بەرپرسی پێوەندییەکانی وەزارەتی پێشمەرگەی حکوومەتی ھەرێمی کوردستان لەبارەی ئەو لیوایانەی لە سنووری کەرکوک کە کشابوونەوە و کێشەیان تێ کەوتبوو، باسی لەوە کرد: "لە لیژنەی باڵای وەزارەتی پێشمەرگە و بۆردی چاکسازیش باس لەو پرسە کراوە و کۆمیتەیەکیش دروست کراوە بۆ ئەوەی ئەو کێشەیە چارە بکرێت".
لە وەزارەتی پێشمەرگە بە ھاوکاریی وڵاتانی ھاوپەیمان پڕۆژەیەکی ٣٥ خاڵی بۆ ئەنجامدانی چاکسازی و ڕێکخستنەوەی وەزارەت و ھێزەکانی پێشمەرگە ئامادە کرا و ئاراستەی ئەنجومەنی وەزیران و سەرۆکایەتیی ھەرێم کرا و پەسەندیان کرد و جارێکی دیکە ئاراستەی وەزارەتی پێشمەرگە کرا بۆ ئەوەی جێبەجێ بکرێت و ئێستا دەست بە جێبەجێکردنی ئەو پڕۆژەیە کراوە و ماوەی سێ ساڵ دانراوە بۆ ئەوەی پڕۆژەکە بەتەواوەتی جێبەجێ بکرێت.
kdp-
