ژمارەیە ئەفسەری میحوەری داقووقی هێزی پێشمەرگەی کوردستان، بە تۆمەتی قاچاخیکردن لەگەڵ ڕێکخراوی توندڕەوی داعش دەستگیر کران.



بەپێی ئەو نووسراوی ژمارە 2142ی لیوای 9ی پیادەی هێزی پێشمەرگە کە ئاراستەی بەڕێوەبەرایەتیی گشتیی هەواڵگریی سەربازیی وەزارەتی پێشمەرگەی کردووە و دەقی نووسراوەکە لە ماڵپەڕی فەرمیی یەکێتیی نیشتمانیی کوردستاندا بڵاو کراوەتەوە، تێیدا ناوی 7 داواکراو بەرز کراوەتەوە کە بە هاوکاریکردنی ڕێکخراوی توندڕەوی داعش تۆمەتبار کراون، لە نێویاندا 3 موقەدەم و 3 نەقیب و مولازمی یەکەمێک هەن و ئەرکەکانیان (فەرماندەی سریە، جێگری میرە، جێگری هەواڵگری، یاریدەدەری فەوج و فەرماندەی فەسیڵە).



هەر لەگەڵ ئەو نووسراوە، ڕاپۆرتێک هاوپێچ کراوە کە تێیدا باس لەوە کراوە: ”دوای گەیشتنی زانیاریی هەواڵگری لەبارەی بوونی چەند ئۆتۆمبێلێکی نەناسراو لە نزیک (تەپەی دووسەر) لە میحوەری داقووق، هێزێکیان پێکهێناوە و بینیویانە کە فەرماندەی سریەی 1ی فەوجی دوو لەگەڵ ئەفسەری کارگێڕیی هەمان فەوج، بە ئۆتۆمبێلی وەزارەتی پێشمەرگەوە لە شوێنێک بوون و دواتر بە دووری 30 بۆ 50 مەتر، هەندێک پێداویستیی ئۆتۆمبێل و سووتەمەنی و خواردن دۆزراوەتەوە. هەروەها لە نزیک ئەو شوێنە، چەند کەسێک هەبوون کە هێزەکەی پێشمەرگە هەوڵی داوە تەقەیان لێ بکات، بەڵام فەرماندەکەی پێشمەرگە ڕێگری کردووە، بەو بیانووەی کە ئەوانە پێشمەرگەن و بۆسەیان بۆ داعش داناوەتەوە، بەڵام دواتر دەرکەوتووە کە ئەو کەسانە قاچاخچیی داعش بوون.



ئەو کەلوپەلانەی لەو شوێنەدا دەستیان بەسەردا گیراوە، بریتین لە (فیول پەمپ و بوشی تویوتا هیلۆکس و گوجل پیم، جۆزەی گەرمی، فیول پەمپی دەرەکی، نۆزڵی گاز، پلاکی ئۆتۆمبێل، چبنەی پستن و ڕینگۆ، تاقم بەگن بیرن، تاقم ڕینگ. هەروەها جلیکانی بەنزین و ڕۆنی مەکینەی ئۆتۆمبێل، دۆشاوی خورما، دۆشاوی تەماتە، تایت، برنج، نیسک و شەکر).









باسنیوز