سوپای ئازادی سووریا له دانیشتنێکیدا له "ئانکارا"ی پایتەختی تورکیا رایگەیاند که ئاگربەستەکەی سووریا هەموو گروپەکان تەنانەت "جەبهەت فەتح ئەلشام"یش دەگرێتەوه جگه له داعش و یەپەگه. ئەمه له کاتێکدایه که جەبهەت فەتح ئەلشام نوێنەری رێکخراوی قاعیده له سووریایه.



"ئوسامه ئەبوزەید" راوێژکاری یاسایی سوپای ئازاد دەڵێت، ئاگربەستەکه هەموو ناوچەکانی سووریا و هەموو گروپه ئۆپۆزسیۆنەکان دەگرێتەوه، جگه له داعش و یەپەگه.



هەرچەنده تورکیا رایگەیاندووه، ئەم ئاگربەسته ئەو گروپانه ناگرێتەوه که لەلایەن نەتەوه یەکگرتووەکانەوه وەک گروپی تیرۆریستی ناسراون، بەڵام سوپای ئازاد گروپی جەبهەت فەتح ئەلشامی خستۆته لیستی ئاگربەستەوه که لەلایەن نەتەوه یەکگرتووەکانەوه وەک گروپێکی تیرۆریستی ناسراوه، بەڵام یەپەگەی بەدەر کردووه که لیستی تیرۆری هیچ وڵاتێک جگه له تورکیادا نییه.



ئاگربەستی سەراسەریی سووریا که تورکیا و رووسیا لەسەر رێککەوتن، له شەوی رابردووەوه جێ‌بەجێ کراوه، هەر چەند له هەندێک شوێن، بەتایبەت ئیدلیب و حەماه شەڕ هەیه.

payamner -