ھاریکارێ پارێزگەرێ دھۆکێ، دیار کر د ھەڤدیتنەکێ دا، ب گشتی بەحسێ بەرھەڤی یێن پارێزگەھا دھۆکێ ھاتە کرن، بۆ حەواندنا وان ئاوارەیان ئەوێن ژ بەر ئۆپەڕاسیۆنا ڕزگار کرنا موسڵ، دێ قەستا سنورێ پارێزگەھا دھۆکێ، کەن.



ئیسماعیل محەمەد، ھاریکارێ پارێزگەرێ دھۆکێ، بۆ کار و بارێن مرۆڤایەتی، بۆ (باسنیوز)، ڕاگەھاند: " ئەڤرۆ سێشەمبێ، 2016/12/27، فەرھاد ئەترۆشی، پارێزگەرێ دھۆکێ و مونیکا تۆرۆ، ھەڤکارا ڕێکخڕاوا (UNHCR)، د ھەڤدیتنەکێ دا بەحسێ ڕێژا ئاوارەیان ل پارێزگەھا دھۆکێ و ئەو کار و خزمەتێن بۆ وان دھێنە پێشکێشکرن و پێدڤی یێن ئاوارەیان ل ناڤ و دەرڤەی کەمپان و ل دەڤەرێن ڕزگار کری ل وەرزێ زڤستانێ ھاتە کرن".


ھاریکارێ پارێزگەرێ دھۆکێ، بۆ کار و بارێن مرۆڤایەتی، دیار ژی کر: "ھەر دوو لایان تەکەز کر، کو دڤێت ھەموو بەرھەڤی ل ناڤ کەمپێن نوی ھاتینە ئاڤاکرن بھێنە کرن، پێدڤی یێن ژیانێ بۆ ئاوارەیان بھێنە دابین کرن و خزمەتا ئاوارەیان باشتر بھێتە کرن".



گوتژی: "پتر ژ 700 ھزار ئاوارە ل پارێَزگەھا دھۆکێ ھەنە، 22 کەمپ بۆ ھاتینە ئاڤاکرن و کار ل سەر ئاڤاکرنا 7 کەمپێن دی ژی دھێتە کرن، ژ بۆ وان ئاوارەیێن ژ مۆسل دھێن، و ھندەک ژ وان کەمپان ژی کەتینە د خزمەتا ئاوارەیان دا، و ڕێکخڕاوا (UNHCR) ب ھەڤکاری دگەل بۆردێ پارێزگەھا دھۆکێ، شیاینە ئەڤ ساڵە گازا سپی ل سەر 3600 خێزانێن ئاوارە بەڵاڤ بکەن و ل ڤان نێزیکان دێ گازا سپی ل سەر 1800 خیزانێن دی ژی ھێنە بەڵاڤ کرن".
bas news-