بەڕێوەبەری شوێنەواری کۆیە، ڕایدەگەیەنێت کە وەزیری شارەوانی ھەرێمی کوردستان، بەڵێنی ھاوکاری بە شوێنەواری سنوورەکە داوە و مافورێکی کۆنیشی پێشکەشی قشەڵەی کۆیە، کردووە.



سەرکەوت سۆفی، بەڕێوەبەری شوێنەواری کۆیە لە لێدوانێکدا بۆ (باسنیوز) ڕاگەیاند: "ئەمڕۆ دووشەممە 26/12/2016 بەمەبەستی گەیاندنی چەند داواکارییەک، سەردانی وەزارەتی شارەوانی و گەشتوگوزارمان کرد، چەند داوکارییەکی تایبەت بە برەودان بە شوێنەوارمان بە نەورۆز محەمەد، وەزیری شارەوانی و گەشتوگوزار دا، بەڵێنی پێداین بۆ ساڵی 2017 ھاوکارییەکی باشمان بکات".



بەڕێوەبەری شوێنەواری کۆیە، ئەوەشی خستەڕوو: "ھاوکات وەزیری شارەوانی، مافورێکی زۆر کۆنی پێشکەش کردین، بڕیارە ئێمەش وەک شتێکی کلتووری لە قشڵەی کۆیە دایبنێن، بۆ ئەوەی ھاوشێوەی کەلوپەلە شوێنەواری و کلتوورییەکانی دیکە، ببێتە جێی سەرنجی گەشتیارانی شوێنەوار".



گوتیشی: "خۆشبەختانە ماوەیەکە جگە لە لایەنە پەیوەندارەکان، ھاووڵاتیان و دڵسۆزانی شوێنەوار، ھاوکاری ماددیمان دەکەن، بۆ ئەوەی برەو بە شوێنەواری سنوورەکەمان بدەین".
bas news-