حکوومەتی عێراق ئاگاداری هەوڵەکانی سەربەخۆیی کوردستانە
ماجید شنگالی، پەرلەمانتاری پارتی دیموکراتی کوردستان لە پەرلەمانی عێراق لە لێدوانێکی رۆژنامەوانیدا رایگەیاندووە، کە سەربەخۆبوون و دامەزراندنی دەوڵەتی کوردستان بڕیارێکی ”یەکلابووەوەیە“ و بڕاوەتەوە.
ماجید شنگالی هەروەها رایگەیاندووە، کە گفتوگۆ لە نێوان بەرپرسانی باڵای هەرێمی کوردستان و عێراق لەبارەی سەربەخۆبوونی کوردستانی باشوور کراوە و ”بەغدا ئاگاداری هەوڵەکانی سەربەخۆیی کوردستانە“.
زۆربەی بەرپرسانی باڵای هەرێمی کوردستان ئاماژە بەوە دەکەن، کە پێویستە بۆ سەربەخۆبوونی کوردستان و دامەزراندنی دەوڵەتی کوردستان، گفتوگۆ لەگەڵ حکوومەتی عێراقی بکرێ.
دوای شکستهێنان بە داگیرکاریی رێکخراوی توندڕەوی داعش لە ناوجە کوردستانییەکانی سنووری پارێزگاکانی نەینەوا، دیالە و سەڵاحەدین و کۆنتڕۆلکردنەوەی ئەو ناوچانە لەلایەن هێزەکانی پێشمەرگەوە، مەسعود بارزانی، سەرۆکی هەرێمی کوردستان و فەرماندەی گشتیی هێزە چەکدارەکانی کوردستان رایگەیاند، کە ئەو شوێنانە دوا خاڵی سنووریی کوردستانە و پێشمەرگە لێیان ناکشێتەوە.
لە مانگی حوزەیرانی 2014 و لە سەردەمی سەرۆک وەزیرانیی نوری مالیکی، دوای هەرەس هێنان و شکستی سوپای عێراق، شارۆچکەی حەویجە لە پارێزگای کەرکووک و زۆربەی ناوچەکانی پارێزگاکانی نەینەوا، سەڵاحەدین، دیالە و ئەنبار لەلایەن چەکدارانی رێکخراوی توندڕەوی داعش داگیر کران.
باسنيوز
