کادیرێکی پێشکەوتووی بزووتنەوەی گۆڕان، ڕەخنە لە پارێزگاری سلێمانی دەگرێت کە لەسەر پشکی بزووتنەوەکە لە پۆستەکەی دایە و ڕای دەگەیەنێت، پارێزگار (کە ئەو بە موتەسەریف وەسفی کردووە)، ناتوانێت کارەبای زیادەڕۆی باخ و ڤێلای ماڵی بەرپرسان ببڕێت.



ڕێبوار حەمە، کادیری پێشکەوتووی گۆڕان کە سەرنووسەری پێشووی کەناڵی (KNN)ی ئەو بزووتنەوەیە بووە، لە پێگەی تایبەتیی خۆی لە تۆڕی کۆمەڵایەتیی (فەیسبووک)، نووسینێکی بڵاو کردووەتەوە و تێیدا ڕەخنەی لە سەردار قادر، لەبری پارێزگاری سلێمانی گرتووە و ڕای گەیاندووە: ”موتەسەریفی سلێمانی لەسەر گیرفانی هاووڵاتییان، لامەرکەزیەت جێبەجێ دەکات“.



ئەوەشی ڕوون کردووەتەوە: ”دوای دانانی پێوەری ئاو بۆ ماڵان و وەرگرتنی 400 هەزار دینار لە هەر ماڵێک لە لایەن کۆمپانیای جێبەجێکاری پڕۆژەکەوە، پێوەری کارەبای 20 ئەمپێریش دەخرێتە بواری جێبەجێکردنەوە و بڕیارە هەر بەشدابوویەکی کارەبا 19 هەزار دیناری لێ وەربگیرێت“.



ئەو کادیرە پێشکەوتووەی گۆڕان ئاماژەشی بەوە کردووە: ”جەنابی موتەسەریف جورئەتی ئەوەی نییە بچێتە هەولێر و داوای سووتەمەنی بۆ وێستگەی بازیان بکات و ناوێرێت کارەبای تەجاوزاتی باخ و ڤێلای ماڵی بەرپرسەکان ببڕێت، دەیەوێت لەسەر گیرفانی خەڵک، عەیب و عارەکانی ئیدارەکەی بشارێتەوە“.



بە گوتەی ڕێبوار حەمە، لە سلێمانی زیاتر لە 540 هەزار بەشداربووی کارەبا هەیە و ئەگەر هەر بەشدابوویەک 119 هەزار دیناری لێ وەربگیرێت، ئەوا 10 ملیار و 640 ملیۆن دینار لە ”ناوچاوانی داهێنانەکانی موتەسەریف“ دەچێتە گیرفانی کۆمپانیاکان. ئەوەشی ئاشکرا کردووە: ”بۆ پێوەری ئاو، 21 ملیار و 600 ملیۆن دینار بۆ کۆمپانیاکان لە خەڵکی سلێمانی وەرگیراوە، واتە بۆ دانانی دوو پێوەر، زیاتر لە 32 ملیار دینار لە خەڵکی سلێمانی وەردەگیرێت“.



لە کۆتاییشدا نووسیویەتی: ”ئافەرین موتەسەریف بۆ خۆت و پڕۆژەی ڕووتانەوەی خەڵک“.



ئەمە لەکاتێکدایە کە پێشتر بەرپرسانی پارێزگای سلێمانی ڕایانگەیاندووە، بە مەبەستی دابەشکردنی کارەبا بەسەر تەواوی هاوبەشەکانیان، جۆزەی 20 ئەمپێری بۆ ماڵان دادەندرێت، لە جێگەی جۆزەی 40 ئەمپێری.









باسنیوز