ئەمڕۆ "پشتیوان سادق" وەزیری پەروەردەی حکومەتی ھەرێمی کوردستان, ئامادەیی مەراسیمێکی تایبەتی بەڕێوەبەرایەتی پەروەردەی دەشتی ھەولێر بوو, کە تێیدا ڕێز لە ١٠سەرپەرشتیاری پەروەردەیی و مامۆستای خانەنشینکراو گیرا و خەڵات بەسەر ٣٤قوتابی سەرکەوتووی پۆلی نۆی بنەڕەتی و دوانزەی ئامادەیی(زانستی و وێژەیی)ی سەر بە سنووری بەڕێوەبەرایەتییەکە دابەش کرا.



سەرەتای مەڕاسیمەکە مامۆستا "عەلی عودە" بەڕێوەبەری پەروەردەی دەشتی ھەولێر وتەیەکی پێشکەش کرد و گوتی: "خۆشحاڵین کە لە خزمەتی چەندین سەرپەرشتیار و مامۆستا بە ئەزموونداین کە ساڵیانێکی زۆرە خزمەتی کەرتی پەروەردە و خوێندنیان لە ھەرێمی کوردستان کردووە".



ھەر لە درێژەیی مەراسیمەکەدا داتابەیسی بە ئەلکترۆنیکردنی بەڕێوەبەرایەتییەکە خرایە ڕوو کە بە ئەلکترۆنیکردنی سەرجەم بەشەکانی نێو بەڕێوەبەرایەتییەکە و کۆکردنەوە و لەبەردەستدانی داتا و زانیاری تایبەت بە مامۆستایان ھەر لە (کاروباری میلاکات و ئاڵوگۆڕ و مووچە و زانیاری کەسی) دەگرێتەوە،‌ بەڕێوەبەری پەروەردە لەم بارەیەوە گوتی: "ئەم داتابەیسە شۆڕشێکی گەورەیە لە دروستکردنی داتای پەروەردەی و نەھیشتنی ڕۆتین و ڕاییکردنی کارەکان بە خێرای بۆ مامۆستایان و سەردانکەرانی بەڕێوەبەرایەتییەکە تا چیتر ھێچ مامۆستایەک بەسەر مامۆستایێکی دیکەدا فەرز نەکرێت و ھەموو کەس بە پێی ڕێنمایی و بە پێی مافی خۆی کاری بەسەردا دابەش بکرێت و دادپەروەری بھێنرێتە گۆڕێ.



لە کۆتاییدا خەڵاتەکان لە لایەن وەزیری پەروەردە و بەڕێوەبەری پەروەردە و بەرپرسانی حکومی ناوچەکەوە بەسەر سەرپەرشتیار و مامۆستایانی خانەنشین و قووتابییە سەرکەوتووەکانی سنوورەکە دابەش کرا.
payamner-