بەبۆنەی دامەزراندنی یەکێتی ئافرەتانی کوردستان, مەکتەبی سیاسی پارتی دیموکراتی کوردستان پەیامێكی پیرۆزبایی ئاراسته‌ی ئه‌و یه‌كێتییه‌ كرد.



ئه‌مه‌ش ده‌قی په‌یامه‌كه‌یه‌:

بەڕێز د. ڤیان سلێمان سکرتێری یەکێتی ئافرەتانی کوردستان..

بەڕێزان ھەڤاڵانی مەکتەبی سکرتاریەت و ئەنجوومەنی باڵا..

بەبۆنەی(٦٤)ھەمین ساڵوەگەڕی دامەزراندنی یەکێتیە تێکۆشەرەکەتان، یەکێتی ئافرەتانی کوردستان گەرمترین پیرۆزبایی لە ئێوەو ئەنجوومەنەکان و گشت ئەندام و ئافرەتانی کوردستان دەکەین، ھیوادارین ھەمیشە ھەر سەرکەوتوو بن لە ھەوڵ و کۆشش و کاروچالاکیەکانتان بۆ دابینکردنی گشت مافەکانتان لە ئازادی و یەکسانی و بەختەوەری.

کاتێک یەکێتی ئافرەتانی کوردستان بەر لە(٦٤)ساڵ بە پاڵپشتی و بڕیاری سەرکردە و رێبەری نەتەوەییمان ((بارزانی نەمر)) دامەزرا، ھەنگاو ودەسکەوتێگی دیکەی گرنگ بوو بۆ سەرجەم توێژی ئافرەتان و وەک سەکۆیەکی کاریگەر توانی بەو تەمەنە دەوڵەمەندەی رۆڵی دیارو بەرچاوی خۆی شانبەشانی تێکۆشانی گەلەکەمان و بزووتنەوە رزگاریخواز و سیاسیەکەی لە گشت قۆناغ و شێوازەکانی خەبات و کۆڵنەدان دا ببێنێ و گەلێک دەسکەوتی بەنرخیش بەدەست بێنێ.

ئاشکرایە توێژی بەرفراوانی ئافرەتان بەپێی ئەو پانتاییەوپێگەیەی ھەیانە لەنێو کۆمەڵگەدا، چ ئەرک وکارێکی چارەنووسسازیان لە ئەستۆدایە و چ سەنگ و کاریگەریەکیشیان ھەیە بەسەر کۆمەڵگەو پێشکەوتن و بونیاتنانی ئایندەوە، لەو رووەوەش قوربانی زۆریان داوەو بەردەوامیشن لەو رێگایەدا، بۆیە رۆڵی بەرپرسانەی ئێوەویەکێتیەکەتان گرنگ و بایەخدارە، بەتایبەتی لەو قۆناغە چارەنوسسازەی ئەمڕۆماندا شانبەشانی رۆڵەکانی گەلەکەمان و پێشمەرگە قارەمانەکان بۆ رووبەڕووبونەوەی مەترسیەکان و پەلامارو ھەڕەشەی تیرۆریستان و دوژمنان و نەیارانمان و داکۆکیکردن و پاراستنی ئەو ئەزموونەو دەسکەوتەکانمان و دەربازبوون لەو ئاستەنگ وکۆسپانەی لەئارادان بۆ گەیشتن بە سەربەخۆیی یەکجارەکی.

جارێکی دیکە بەو بۆنەوە پاڵپشتی و پشتیوانی تەواوی خۆمان بۆ ئێوەو یەکێتیەکەتان دووپات دەکەینەوە و ئومێدەوارین ھەردەم پێشەنگ و پێشڕەوی بزووتنەوەی ئافرەتانی کوردستان بن بۆ بەرجەستەکردن و بەدەستھێنانی گشت ماف و داخوازیە رەواکانتان، ھەروەھا ھەردەم ئەو دەنگە زوڵاڵ و راستەقینەیە بن، کە شەست و چوار ساڵە دەدرەوشێەوەوگەشە دەکات و پەرەدەستێنێ و لەھەر قۆناغ وسەردەمێکیشدا وەڵامی واقیعیانەوگونجاوی خواست و ویستەکانی ئافرەتان و کێشە رەواکانیانن.
payamner-