ئەنجومەنی پیرانی فەرەنسا پڕۆژە یاسایەكی پەسند کردووە کە تایبەتە بە تاوانەكانی داعش دژ بە كوردانی ئێزدی.

عەلی دۆڵەمەڕی نوێنەری حكوومەتی هەرێمی کوردستان لە فەرەنسا ڕایگەیاند "پاش هەوڵێكی زۆر توانرا شتێكی گرنگ بۆ كەمە نەتەوەكانی كوردستان ئەنجام بدرێت و گوتی: "پاش هەوڵدانێكی زۆرمان و پەیوەندیكردن بە پەرلەمانتارەكان و دامودەزگاكانی دیکەی حكوومەتی فەرەنسی هەر لە سەرەتای شەڕی داعش دژی كەمە نەتەوەییەكانی ئایینی و نەتەوەیی، بۆ بە ناساندنی جینوساید، بەختەوەرانە ئەنجومەنی پیرانی فەرەنسی( سێنات) پڕۆژەی بە جینۆسایدكردن، تاوانەكانی دژی مرۆڤایەتی و تاوان بەرانبەر بە كەمە نەتەوەییەكان لە عێراق و سووریای پەسەند كرد."

دۆڵەمەڕی ئاشكرای كرد بە كۆی دەنگی 309 سێناتوری ئامادەبوو، ئەنجومەنی پیرانی فەرەنسی لە ٦/١٢/٢٠١٦ پڕۆژەكەی پەسند كرد.

نوێنەرەكەی حكوومەتی هەرێم لە فەرەنسا گوتیشی: "بەپێی ئەو یاسایە كە لە سێناتی فەرەنسی پەسەند كراوە، تاوانەكانی داعش دژی ئێزدی و مەسیحی و كەمە نەتەوەییەكانی تر بە جینۆساید دەناسرێن لە لایەن فەرەنسا و لە داهاتووشدا لەلایەن دادگای تاوانەكانی نێودەوڵەتییەوە دەناسێنرێت."




باسنيوز