کەسوکاری شەهیدان لە پارێزگای دهۆک، لە دژی لێدوانەکەی سروە عەبدولواحید، پەرلەمانتاری گۆڕان، یاداشتێکیان بڵاو کردەوە و داوای هەڵگرتنی پارێزبەندییان لەسەر ئەو پەرلەمانتارە کرد.

لەو یاداشتەدا کە لە شاری دهۆک خوێندرایەوە، ئاماژە بەوە کراوە کە دەبێت سنوورێک بەرامبەر ئەو بێڕێزییانە دابندرێت کە بەرامبەر بە خوێنی شەهیدان دەکرێت و داواشیان لە پەرلەمانتاران کردووە، پشتیوانی لە کەسوکاری شەهیدان بکەن.

لە یاداشتەکەدا جەخت لەوە کراوەتەوە: ”نیگەرانین ئێستا ئەندامێکی بەرزترین دەسەڵاتی عێراق، سووکایەتی بە شەرەفی ئێمە بکات و هەستمان بریندار بکات. بۆیە داوا دەکەین سروە عەبدولواحید داوای لێبوردن لە خێزانی شەهیدان بکات و دان بە هەڵەی خۆیدا بنێت“.

هاوکات داوا لە پەرلەمانی عێراق کرا، ”پارێزبەندی“ لەسەر ئەو پەرلەمانتارەی گۆڕان هەڵبگرێت و یاسا ڕۆڵی خۆی بگێڕێت. قسەکانی سروە عەبدولواحیدیش بە پێشێلکردنی دەستوور و ڕێزنەگرتن لە پیرۆزییەکانی خەڵکی لێک درایەوە.

کەسوکاری شەهیدان لە دهۆک، لە یاداشتەکەیاندا، بزووتنەوەی گۆڕانیان شەرمەزار کرد و ڕایان گەیاند: ”گۆڕان لە جیاتی ڕەتکردنەوەی قسەکانی، بەیاننامەی دەرکردووە و بیانووی بۆ پەرلەمانتارەکەی هێناوەتەوە و پشتیوانی کردووە، بۆیە شەرمەزاری دەکەین. داواش لە هەموو لایەنە کوردستانی و عێراقییەکان دەکەین، بێدەنگ نەبن و یەک هەڵوێست بن“.

پێشتر سروە عەبدولواحید، ئەندامی فراکسیۆنی گۆڕان لە پەرلەمانی عێراق، لە میانی بەرنامەی (بە ڕاشکاوی)ی کەناڵی ئاسمانیی (دیجلە)، ئاماژەی بەوە دابوو: ”کەسوکاری شەهیدان بۆ پەیداکردنی بژێویی منداڵەکانیان، خۆیان دەفرۆشن“، بەو هۆیەشەوە لەناوخۆی هەرێمی کوردستاندا کاردانەوەیەکی یەکجار زۆر دروست بوو و فراکسیۆنی پارتی و کەسوکاری شەهیدان و چەندان لایەنی دیکە بڕیاری تۆمارکردنی سکاڵایان لەدژی ئەو پەرلەمانتارە ڕاگەیاند.











باسنيوز