بەپێی ڕاگەیندراوێکی کۆمەڵەی قوربانیانی کیمیاباران کردنی ھەڵه‌بجە کە کۆپیەکی بۆ ماڵپەڕی فەرمیی پارتی دیموکراتی کوردستان نێردراوە تێیدا ھاتووە، قسەکانی پەڕلەمانتارەکەی گۆڕان خزمەتێکی نایابە بە دوژمنانی گەلی کوردستان کە چۆن ئەوان بە چەکە کۆکوژەکانیان و گوللەکانیان لـــە سەنگەرەوە جەرگمانیان سوتاند و بریندار کرد، ئەوا ئەویش بووە ھۆی زیاتر کولانەوە و تازە کردنەوەی برینە ساڕێژ نەبوەکانمان.

کۆمەڵەی قوربانیانی کیمیابارانی ھەڵەبجە لــــە مەڕ وتەکانی (سروە عبدالواحید) ئەندام پەڕرلەمــانی گۆڕان، سەبارەت بە دایک و خێزانی شەھیدان لەو ڕاگەیندراوەدا ئاماژەی بەوەشکردووە، دیارە وەک لای ھەمووان ڕوون و ئاشکرایە خوێنی گەشی "شەھیدان" پیرۆزترین و مەزنترین ئامرازی سەر زەوییە لــە ڕووی دونیایی و ئــایینیشەوە.

بەپێی ھەمان ڕاگەیندراو، ھەر بۆیە قوربانیدەری سەرەکی لــەم پێناوەدا "دایک" و "خێزان"ی ئەو شەھیدە نەمرانەن و ھەمووان دەزانن کــە ئەو قوربانیدان و گیان بەخت کردنە بۆتە ھۆی پاراستن و شکۆ و شوناسی نەتەوەی کورد بە گشتی، بەڵام بە داخەوە زۆر کەس لە سەر ئەم خوێنە گەشە و بێ دەرامەتی خێزانەکانیان بونەتە سەرمایەدار و خاوەن پلە و پۆست و بێ منەت لــــەم قوربانیدانە و جەرگ سوتانی دایکــــان.

باس لەوەشکراوە، ئێمە نازانین کە ناوبراو بە چ مەبەستێک ئەم وتەیە لە زاریەوە کەوتۆتە خوارەوە، بەڵام دەتوانین بڵێین ئەمەش سوکایەتیەکی دیکەیە بە خۆڕاگری خانەوادەی سەرجەم شەھیدان بە گشتی و بارگرانیەکی دیکەیە بۆ سەر شانیان، ھەروەھا خزمەتێکی نایابیشە بە دوژمنانی گەلی کوردستان کە چۆن ئەوان بە چەکە کۆکوژەکانیان و گوللەکانیان لـــە سەنگەرەوە جەرگمانیان سوتاند و بریندار کرد ئەوا ئەویش بووە ھۆی زیاتر کولانەوە و تازە کردنەوەی برینە ساڕێژ نەبوەکانمان.

لەکۆتاییدا ھاتوو، وێڕای نیگەرانی و ئیدانەکردنمان، داوای ڕوونکردنەوە و دەربڕینی ڕاستی ئەو وتەیە دەکەین، دەنا دەرئەنجام و ھەڵوێستی دیکەمــــان دەبێت.
kdp--