ژنە پەرلەمانتارێکی گۆڕان، باسی ژنانی شەهید دەکات و دەڵێت: ”بە ناچاری خۆیان دەفرۆشن“، ژنە پەرلەمانتارێکی لێژنەی داکۆکیکردن لە مافەکانی ئافرەتانیش داوا لە داواکاری گشتی دەکات، ”لەسەر ئەم سووکایەتییە“ بێتە دەنگ.

سروە عەبدولواحید، ژنە پەرلەمانتاری گۆڕان، لە میانی بەرنامەی (بە ڕاشکاوی)ی کەناڵی ئاسمانیی (دیجلە)، ئاماژەی بەوە داوە: ”ژنانی پێشمەرگە بۆ ئەوەی خواردنی منداڵەکانیان دەستکەوێ، خۆیان دەفرۆشن“.

لە بەرامبەردا، حەیات مەجید ، ئەندامی لێژنەی داکۆکیکردن لە مافەکانی ئافرەتان لە پەرلەمانی کوردستان، ڕاگەیاند قسەکردن لە زاری نوێنەرێکی گەلەوە لەسەر خانەوادەی شەهیدان و خێزانی شەهیدان، لە کاتێکدا شەهیدانی ئەم وڵاتە بە دەریایەک خوێنەوە بەم دۆخە گەیشتووە و خاوەنی هەزاران شەهیدین، خێزانەکانی ئەو شەهیدانە منداڵەکانیان پەروەردە کردووە، ئەم خێزانانەی دەیانبینن، ئێستا منداڵەکانیان مامۆستا و پزیشک و ئەندازیارن و کەسانێک پەروەردەیان کردوون کە مێردەکانیان شەهید بوون و کۆڵیان نەداوە، بۆیە ئەمە سووکایەتییە“.

دووپاتیشی کردەوە: ”قسەکردن لە زاری کەسێکی لەم جۆرەوە، پێویستە داواکاری گشتی لەوە بێتە دەنگ و بێدەنگ نەبێت کە سووکایەتی بە کەسوکاری شەهیدان بکرێت“.

حەیات مەجید باسیشی لەوە کرد کە کەسانێک هەن لەنێو گۆڕاندا ڕێز لە خوێنی شەهیدان ناگرن و دەڵێت: ”ئەم وڵات و پەرلەمانە بەرهەمی خوێنی شەهیدانە، قسەکردن لە زاری کەسانێکی لەمجۆرەوە پێویستە خەڵکی کوردستان لێیان بێنە دەنگ و بە ئاسانی لێیان تێنەپەڕێت، هەر ئەوانەش پێشتر پێشمەرگەیان بە میلیشیا شوبهاندووە“.
PAYAMNER-