ده‌ڤه‌را به‌روارى بالا ئێكه‌ ژ وان ده‌ڤه‌رێن ب ناڤ و ده‌نگ ل سه‌ر ئاستێ هه‌رێما كوردستانێ ب هه‌بوونا سێڤان و سالانه‌ جۆتیارێن ڤێ ده‌ڤه‌رێ به‌رهه‌مه‌كێ زۆر یێ سێڤان به‌رهه‌م دئینن، لێ گازندا وان جۆتیاران ئه‌وه‌ ل وه‌رزێ گه‌هشتنا سێڤان دا پتریا سێڤێن وان د ناڤ زه‌ڤیان دا درزن و ئه‌و چ مفاى ژێ نابینن و سێڤێن بیانى ژى دهێنه‌ كوردستانێ.

سه‌ردار وه‌یسى جۆتیاره‌كێ ڤێ ده‌ڤه‌رێیه‌ دیار دكه‌ت: ئه‌ڤه‌ چه‌ند ساله‌ رێنجبه‌ریا وان به‌لاش دچیت و ئه‌و پارێ ئه‌و ل سێڤان د مه‌زێخن هه‌ر ژ كه‌زاختنێ و كۆلانێ و ئاڤدانێ حه‌قێ خو ناگرن و سێڤێن وان هه‌مى ل بنى رزین و كه‌س ناكریت.

عه‌بدۆلا ئه‌حمه‌د جوتیاره‌كێ دى یێ ده‌ڤه‌را به‌روارى بالایه‌ كو بۆ ماوێ پتر ژ 30 سالانه‌ كارێ چاندنا سێڤا دكه‌ت و دبێژیت: سه‌قا و ئاڤ و هه‌وایێ ده‌ڤه‌را به‌روارى بالا بوویه‌ ئه‌گه‌ره‌كێ سه‌ره‌كى كو سێڤا ڤێ ده‌ڤه‌رێ یا بناڤ و ده‌نگ بیت و ئه‌ڤ سێڤه‌ ژ هه‌مى جۆرێن دى یێن سێڤێن بیانى باشترن، ژ به‌ر كو تام و ره‌نگێ وێ خوشترن ژ وان سێڤێن ژده‌رڤه‌ دهێنه‌ كوردستانێ و كێشا وێ یا ناڤنجیه‌ و نه‌گه‌له‌كا مه‌زنه‌ كو ئه‌ڤه‌ بو كرین و فروتنێ گه‌له‌كا گۆنجایه‌.

ئه‌كره‌م ساركی شاره‌زا د بیاڤێ چاندنێ دا و خودانێ عه‌لوه‌كا فێقی دبێژیت: "دوهی 40 سندۆقێن باشترین جۆرێ تری ل عه‌لوا من بوون و كه‌سێ نه‌كڕین، ما كی دێ كڕیت، ب تنێ ئاواره‌ دهێن ژ مه‌ دكڕن، چونكو وان پاره‌یێ هه‌ی، كیلۆیا وی جۆرێ تری به‌ری دوو سالان مه‌ ب هزار و 500 دینار دفرۆت و نوكه‌ ب 650 دینارایه‌ و ده‌م ژی بۆ دڤێت هه‌تا دهێته‌ فرۆتن و ئه‌ڤه‌ دوو رۆژه‌ ل عه‌لوا من و هێشتا نه‌هاتیه‌ فرۆتن.

ب دیتنا ئه‌كره‌م ساركی، ئه‌رزانبوونا بهایێن به‌رهه‌مێن چاندنێ بۆ گرتنا رێكا مووسلێ دزڤریت كو به‌ری دوو سالان ئه‌و باژێره‌ ژلایێ تیرۆرستێن داعشێ ڤه‌ هاتیه‌ داگیركرن و دبێژیت: "به‌رهه‌مێن چاندنێ یێن دهۆكێ هه‌تا پارێزگه‌ها میسانێژی دچوون، ب تنێ باژێرێ مووسلێ نێزیكی سێ ملیۆن كه‌س لێ دژین، هندی به‌رهه‌مێن چاندنێ یێن زێده‌ ل بازارێ هه‌بان، بۆ مووسلێ دهاتنه‌ هنارتن، به‌لێ پشتی رێیا مووسلێ هاتیه‌ گرتن، كارتێكرنه‌كا مه‌زن یا ل به‌رهه‌مێن چاندنێ بووی ل دهۆكێ، چونكی به‌رهه‌مێ چاندنێ ئه‌وێ د بازاری دا، گه‌له‌ك پتره‌ ژ داخوازیا ل سه‌ر هه‌ی".


ساركی گۆت ژی: "ئه‌ز پێشبینیێ دكه‌م ئه‌ڤ ساله‌ كیلۆیا سێڤێن به‌رواریا كو باشترین جۆرێ سێڤێ یه‌ ژ روویێ تامێ و بێهنێ ب 250 دیناران ژی نه‌چیت، به‌لێ د هه‌مان ده‌م دا كیلۆیا سێڤا بیانی ب هزار و 500 دیناران دچیت، له‌وما گه‌له‌ك ژ وه‌لاتیان ده‌ست ژ چاندنێ یێ به‌ردای و نوكه‌ 80% ژ جوتیاران ده‌ست ژ كارێ چاندنێ یێ به‌ردای".


ل دۆر بهایێ سندۆقا باجانان ل عه‌لوان، گۆت: "بهایێ ئێك سندۆقێ ب هزار و 500 دینارانه‌ و باجانا گه‌له‌ك باش سندۆقا وێ و دوو هزار دینارانه‌".
ئه‌كره‌م ساركی دیار كرژی كو كارێ عه‌لوان گه‌له‌ك یێ لاواز بووی و هه‌تا نوكه‌ 13 كه‌سان ل بازارێن عه‌لوان، عه‌لوێن خوه‌ یێن گرتین، من ژی پاته‌ك یێ ب عه‌لوا خوه‌ ڤه‌كری و ل سه‌ر نڤیسی (بۆ كرێ یان فرۆتنێ)".














باسنيوز