چەکدارانی ڕێکخراوی توندڕەوی داعش هەوڵەکانیان بە مەبەستی شاردنەوەی شڵەژانی دۆخی مووسڵ، چڕ کردووەتەوە.



ئەمڕۆ پێنجشەممە 20\10\2016، میدیاکان بڵاویان کردەوە کە چەکدارانی ڕێکخراوی توندڕەوی داعش و تەنانەت خەڵکی مووسڵیش، تووشی شڵەژانێکی گەورە بوون لە ئەنجامی ئەو پێشڕەوییانەی کە لە (باکوور، ڕۆژهەڵات و باشوور)ی مووسڵ بە ئاراستەی سەنتەری شارەکە هەیە.



ئەوەش ئاشکرا کراوە کە ئەمڕۆ چەکدارانی داعش ویستوویانە دۆخە شڵەژاوەکەی مووسڵ بشارنەوە و منداڵی لایەنگرانی خۆیان و دانیشتووانی مووسڵیان بە زۆر لە ماڵەکانیان بردووەتە دەرەوە و پێیان گوتوون کە دەبێت لە دەرەوە یاری بکەن.



ئەمڕۆ هێزەکانی پێشمەرگەی کوردستان لە میحوەرەکانی (تەلسقۆف، ناوەران و باشیک)، هێرشی بەرفراوانیان بۆ سەر ڕێکخراوی توندڕەوی داعش دەست پێ کرد و کەمێک لەمەوبەر، حەمید ئەفەندی، بەرپرسی میحوەری باشیک بە (باسنیوز)ی ڕاگەیاند: ”تاوەکوو ئێستا پێشمەرگە بە درێژایی 35 کیلۆمەتر و پانیی 5 کیلۆمەتر پێشڕەوی کردووە“
Bas News-