گوتەبێژی هاوپەیمانیی نێودەوڵەتی رایدەگەیەنێت، کە هاوکاریی زیاتری هێزە شەڕکەرەکانی دژی رێکخراوی توندڕەوی داعش دەکەن، کە هێزی پێشمەرگەی کوردستان بەشێکی کاریگەرە تێیدا.



عەقید ستیڤ وارن، گوتەبێژی هاوپەیمانیی نێودەوڵەتی بە (شەرقولئەوسەت)ی راگەیاندووە، کە داعش %40 ئەو ناوچانەی داگیری کردبوون، لە دەست داوە و هاوپەیمانان و هێزە زەمینییەکان شکستیان بەو رێکخراوە هێناوە.



عەقید ستیڤ وارن ئاماژەی بەوەش داوە، کە کاری لەپێشینەی هاوپەیمانان بۆردومانکردنی ژێرخانی ئابووریی ئەو رێکخراوەیە، لێدانی سەرکردەکانییەتی و هێنانە دەرەوەی داعشە لە شار و شوێنە ئاوەدانییەکان.



گوتەبێژی هاوپەیمانیی نێودەوڵەتی هەروەها رایگەیاند، کە هاوپەیمانان بەردەوام دەبن لە هاوکاری کردن و راهێنانی سەربازی بۆ ئەو هێزە ناوچەییانەی لەسەر زەوی شەڕی دژی داعش دەکەن، کە هێزی پێشمەرگەی کوردستان کاریگەرترین و سەرکەوتووترین هێزی زەمینییە لە شەڕی دژی ئەو رێکخراوە.



دوای هێرشی چەکدارانی داعش لە مانگی ئابی 2014 بۆ سەر کوردستانی باشوور، ژمارەیەک وڵاتی ئەوروپی و رۆژئاوایی بە سەرکردایەتیی ئەمریکا، هاوپەیمانییەکیان پێکهێنا، کە لە رێی ئاسمانییەوە بنکە و بارەگاکانی داعش بۆردومان دەکەن و راوێژکارە سەربازییەکانیان مەشق و راهێنان بە هێزی پێشمەرگە دەکەن، وێڕای ناردنی هاوکاریی سەربازی بۆ هەرێمی کوردستان.





باسنیوز