جێگری فەرماندەی لیوای 6ـی هێزی پێشمەرگە لە خورماتوو دەڵێت، حەشدی شەعبی ئەو رێككەوتنەی پێش دوو رۆژ لەگەڵ كورد ئەنجامی دا، بۆ ئەوە بوو كە زیاتر بەرگری لە خۆیان بكەن و دەرنەكرێن، چونكە گوشاری زۆریان لەسەر بوو و، ئەگەر ئەو رێككەوتنە نەكرابووایە لە خورماتوو دەردەكران.

(بارزان ئەحمەد خاڵە)، بە ماڵپەری فەرمیی پارتی دیموكراتی كوردستانی راگەیاند: "بڕیار بوو ئەمڕۆ كۆبوونەوەیەك لە نێوان هێزی پێشمەرگە و حەشدی شەعبی ئەنجام بدرێت لەبارەی ئاساییكردنەوەی دۆخی خورماتوو، بەڵام بەرپرسانی حەشدی شەعبی ئامادە نەبوون، بۆیە كۆبوونەوەكە بۆ سبەی دوا خرا".

(خاڵە) گوتیشی: "ئەمڕۆ تەنیا هەندێك تەقە هەبوو و شەڕ رووی نەداوە و ئێستایش تا ڕادەیەك دۆخەكە ئاساییە، گەشبینیش نیم سبەی كۆبوونەوەكە سەركەوتوو بێت، چونكە تاكە رێگاچارە بۆ ئەو كێشەیە ئەوەیە كە حەشدی شەعبی لە خورماتوو دەربكرێت".

جێگری فەرماندەی لیوای 6، دەشڵێت: "ئەو گوشارەی لەلایەن كوردەوە لەسەر حەشدی شەعبی دروست كرابوو، بەردەوام بووایە دەتواندرا لەو شارۆچكەیە دەریان بكەین، بەڵام زانییان توانایان نەماوە، داوایان كرد رێككەوتن بكرێت و كۆ ببنەوە، هەر بۆیەیش هاتن لەگەڵ كورد كۆ بوونەوە بۆ ئەوەی خۆیان رێك بخەنەوە، ئەگەر نا رێككەوتنەكە هیچ سوودێكی نەبووە".

باسی لەوەیش كرد كە، كۆبوونەوەكەشیان كرد و خۆیان زیاتر راگرت و، دواتریش بۆ ئێوارەكە هێرشیان كردە سەر كورد، بۆ ئەوەی ئەو شوێنانەی لە دەستیان داون، بیانگرنەوە، بەڵام سەركەوتوو نەبوون.