بەڕێوەبەرایەتی ھاتوچۆی دھۆک ئەمڕۆ 19ی ئازار بە ھەماھەنگی لەگەڵ ھێزەکانی پۆلیس، ئاسایش، دادگا، تەندروستی و شارەوانی، پلانی خۆی راگەیاند بۆ ڕێکخستنی ھاتوچۆ لە ڕۆژانی جەژنی نەورۆزدا و رایگەیاند، نابێت ئۆتۆمبێڵی حکومی لەو رۆژەدا بەکاربھێنرێن.

رائید ئازاد تاھا، وتەبێژی پۆلیسی ھاتوچۆ لە پارێزگای دھۆک راگەیاند: "پۆلیسی ھاتوچۆ لە سەنتەری پارێزگای دھۆک و قەزا و ناحیەکان لە رۆژانی جەژنی نەورۆز لە ئامادەباشیدا دەبن، ھۆبەکانی لێکۆڵینەوەش کراوەدەبن ".

وتیشی: "بۆ رۆژانی جەژن کامێراکانی پۆلیسی هاتوچۆ لەسەر شەقامەکان دەبن و ھەر ئۆتۆمبێڵێک لەلایەن پۆلیسی ھاتوچۆوە بگیرێت تا دوای جەژن شۆفێرەکەی ناتوانێت وەریبگرێتەوە".

بەوتەی ئەو رائیدە: "ھەر شەقامێک لەلایەن پۆلیسەوە ھاتوچۆی تێدا قەدەغەبکرێت، دەبێت شۆفێران پابەندبن پێیەوە، پۆلیسی ھاتوچۆش لە شوێنی گەشتیاراندا ئامادە دەبن لەو رۆژەدا ".

وتەبێژی ھاتوچۆ لە پارێزگای دھۆک، ئەوەشی خستەڕوو: "هاوڵاتیان دەتوانن لەبوونی هەر پێویستییەک و کێشەیەکدا پەیوەندی بکەن بە ژمارە تەلەفۆنی (118)، کارمەندەکانمان لە ئامادەباشیدان و دەچن بە هانای هاوڵاتیانەوە".

وتەبێژی ھاتوچۆ لە پارێزگای دھۆک، داوای لە ھاوڵاتیان و شۆفێران کرد لە رۆژانی جەژنی نەورۆزدا پابەندی رێنماییەکانی ھاتوچۆبن بۆ ئەوەی سەیران و ئاھەنگەکانیان بەخۆشی تێپەڕێنن ".