حەوت وڵاتی سەرەكیی هاوپەیمانیی دژی داعش لەبارەی هاوكاریكردنی پێشمەرگەش گفتوگۆ دەكەن
"ئەش كارتەر و ژان ئیۆ لەدریان" وەزیرانی بەرگریی ئەمەریكا و فەرەنسا بە هاوبەشی میوانداریی هاوتاكانی خۆیان لە وڵاتانی بەریتانیا، ئۆسترالیا، هۆڵەندا، ئەڵمانیا و ئیتاڵیا دەكەن و لەبارەی دوایین گۆڕانكارییەكانی شەڕ لەدژی داعش پێكەوە دیدار و گفتوگۆ دەكەن.
ئەم حەوت وڵاتە هەم لە هێرش و ئۆپەراسیۆنی ئاسمانی و هەم لە پەروەردە و بارهێنان و دابینكردنی چەك و تەقەمەنی بۆ هێزە عێراقییەكان بۆ شەڕ لەگەڵ چەكدارانی توندڕەوی داعش رۆڵی سەەركییان هەیە.
ئەم دیدارە لە حاڵێكدا بەڕێوە دەچێت كە جۆن كێری، وەزیری دەرەوەی ئەمەریكا ئەمڕۆ چوارشەممە لەگەڵ هاوتا رووسییەكەی خۆی (سێرگیئی لاورۆف) لە جنێف كۆ دەبێتەوە.
رووسیا یەكێك لە هاوپەیمانە سەرەكییەكانی حكوومەتی بەشار ئەسەدە و هێز و توانایی سەربازیی خۆی بە كردەوە لە مانگی سیپتەمبەری ساڵی 2015ەوە لە سووریا دەست پێكردووە، وڵاتانی ئەرووپی وازیاری دەست لەكار كێشانەوەی بەشار ئەسەدەن لە دەسەڵات و لە ماوەچی چەند مانگی رابردووودا لەبارەی هێرشە ئاسمانییەكانی سوپای رووسیا بۆ سەر هێز و لایەنە ئۆپۆزسیۆنەكانی سووریا هۆشدارییان داوەتە رووسیا.
هەواڵدەریی فەرەنسا لەزاری بەرپرسانی حكوومەتی فەرەنساوە بڵاوی كردووەتەوە كە دیداری ئەمڕۆی حەوت وڵاتی هاوپەیمان لەدژی داعش بە مەبەستی تاوتوێ و لێكدانەوەی ئەو كار و چالاكییانەیە كەلە ساڵی 2014ەوە هەتا ئێستا ئەنجام دراون، هەروەها رێكارەكانی پەرەپێدانی دەخرێنەڕوو.
رێكخراوی توندڕەوی داعش لە ماوەی ساڵانی 2014 و 2015دا چەند ناوچەیەكی گرنگی خاكی سووریا و عێراقی داگیر كردووە و ئێستاش بەشێك لەو ناوچانەی لێ سەنداروەتەوە، یان پاشەكشەی كردووە.
لەلایەكی دیكشەوە فەرماندەیەكی باڵای سوپای قەرەنسا ئاشكرای كردووە كە رێكار و پلانی داهاتووی وڵاتانی هاوپەیمان لەپێناو ئەنجامی خێرا لە شەڕ و ئۆپەراسیۆنەكان، كۆمەڵێك گرفتیان لەبەردەمە.
حكوومەتی فەرەنسا ئەوەشی ئاشكرا كردووە كە لەبارەی هاوكاری و بردنەسەری توانایی هێزە ناوچەییەكان، سوپای عێراق و هێزەكانی پێشمەرگە لە هەرێمی كوردستان گفتوگۆ دەكرێت.
ئوسترالیا، ئەمەریكا و فەرەنسا ئێستا سەرقاڵی بارهێنان و پەروەردەی نزیكەی 15 هەزار سەربازی سوپای عێراقن، بەپێی راپۆرتەكان لەو رێگایەوە توانیویانە لە بەرامبەر هێرش و تەقینەوەكانی داعشدا توانایی خۆیان بەرنە سەرەوە.
چاوەڕوان دەكرێت وەزیرانی دەرەوەی ئەو حەوت وڵاتە لەبارەی دۆخی ئاڵۆزی لیبیاش گفتوگۆ بكەن.
باسنیوز
