سه‌رچاوه‌یه‌كى هێزى پێشمه‌رگه‌ له‌ كۆبانێ به‌ كوردستان تى ڤى ڕاگه‌یاند كه‌ ئه‌مڕۆ سێ گوندى دیكه‌ له‌لایه‌ن هێزه‌كانى پێشمه‌رگه‌ و شه‌ڕڤانانى كورده‌وه‌ له‌ ده‌وروبه‌رى شارى كۆبانێ له‌ ژێر ده‌ستى چه‌كدارانى تیرۆریستى داعش ڕزگاركراون. سه‌رچاوه‌كه‌ى هێزى پێشمه‌رگه‌ ڕاشیگه‌یاند كه‌ شه‌ڕوپێكدادان له‌ به‌شى ڕۆژهه‌ڵات و ڕۆژئاواى كۆبانێ ڕوویداوه‌. هاوكات سه‌رچاوه‌كه‌ى هێزى پێشمه‌رگه‌ گوتیشى تاوه‌كو ئێستا زیاتر له‌ شه‌ست گوند له‌ ژێر ده‌ستى چه‌كدارانى تیرۆریستى داعش ڕزگاكراون.

هه‌روه‌ها سه‌رچاوه‌كه‌ى هێزى پێشمه‌رگه‌ى كوردستان ڕوونیشیكرده‌وه‌ كه‌ تۆپخانه‌ى هێزى پێشمه‌رگه‌ش له‌ لاى خۆیانه‌وه‌ به‌ چڕى بۆردومانى مۆڵگاكانى داعشیان كردووه‌.

هاوكات به‌پێى چه‌ند زانیارییه‌ك تیرۆریستانى داعش به‌هۆى ئه‌و شكستانه‌ى كه‌ له‌ به‌ره‌كانى شه‌ڕ له‌ هه‌رێمى كوردستان و چه‌ند ناوچه‌یه‌كى عێراق تووشى بوون هێزه‌كانى خۆیان به‌ره‌و ناوچه‌كانى عێراق ده‌هێنن.