وەزیری دەرەوەی نەمسا کە سەردانی هەرێمی کوردستانی کردوە، لە كۆنگرەیەكی رۆژنامەنووسی ڕایگەیاند؛ بۆ گفتوگۆ سەبارەت بە کردنەوەی کونسولخانەی گشتی نەمسا و یەکخستنی هەوڵەکان بۆ کردنەوەی نوسینکەی یەکێتی ئەوروپا لە هەرێمی کوردستان سەردانی هەولێری کردووە.

سباستیان كروز وەزیری دەرەوەی نەمسا دەستتخۆشی لە هێزەکانی پێشمەرگە و هەرێمی کوردستان کرد کە بەرەنگاری تیرۆریستان بوونەوە و ئازایانە داستانی سەرکەوتن تۆمار دەکەن.

وەزیری دەرەوەی نەمسا گووتی: ئەوپەڕی وەفاداریمان بەرامبەر هەرێمی كوردستان هەیە بۆ ئەو هاریكارییە مرۆییەی بەرامبەر ئاوارەكان دەیخاتە روو، هەر بۆ ئەو دەستگرۆییەش ئەمرۆ ئێمە یەك ملیۆن و 250 هەزار یۆرمان بۆ حكومەتی هەرێمی كوردستان هێناوە.

سباستیان كروز بە ئاماژە بە ئارامی و سەقامگیری هەرێمی کوردستان گووتی: پەیوەندییەکانمان لە گەڵ هەرێمی کوردستان پەرە پێدەدەین و بۆ ئەو مەبەستەش، ئەمساڵ كۆربەندی ئابووری دوولایەنە دەبەستین.

وەزیری دەرەوەی نەمسا سەبارەت بە یارمەتییە سەربازییەکانی ئەو وڵاتە بۆ کوردستان گووتی: ئەو یاسایانەی لە نەمسادا هەیە ئاستی دەستوورییان هەیە و بۆ ناردنی چەك بۆ هەرێمی كوردستان رێگریمان لێدەكەن.

بڕیارە ئەمڕۆ وەزیری درەوەی نەمسا و شاندی یاوەری چاویان بە سەرۆكی هەرێمی كوردستان بكەوێت.