سه‌رۆكی هه‌رێمی كوردستان له‌ رۆژی جیهانی ئافره‌تاندا پیرۆزبایی له‌ ئافره‌تانی كوردستان و عێراق و جیهان كرد، هیوای خواست، ئەو بۆنەیە دەرفەتێك بیت بۆ كەمكردنەوەی ئێش و ئازاری ژنانی كوردستان و چیتر پێشێلبوونی كەرامەت و مافی ئافرەتان نەبینین و رایگه‌یاند، پێویسته‌ سنوورێك بۆ ئەو توندوتیژییە جەستەیی و دەروونییە دابنرێت كە لەدژی ژنان لە ئارادایە.



ئه‌مه‌ش ده‌قی په‌یامه‌كه‌ی سه‌رۆكی هه‌رێمی كوردستانه‌:


بەناوی خودای بەخشندە و میهرەبان

بەبۆنەی 8ـی مارس ڕۆژی جیهانیی ئافرەتان گەرمترین پیرۆزبایی خۆم ئاراستەی ئافرەتانی كوردستان و عێراق و هەموو جیهان دەكەم. ڕۆڵی ئافرەت لە بەردەوامی و پێشخستنی ژیان و هێنانەكایەوەی ئاشتیخوازی گرنگ و پیرۆزە. ئەركی سەرشانی هەموومانە ڕێز لە شكۆ و ماف و داواكارییەكانی ئافرەتان بگرین. ئێمە هەموومان قەرزاری فیداكاری و ماندووبوونی ئافرەتانین لە ژیانی ئابووری و كۆمەڵایەتی و سیاسی و فەرهەنگیدا. بەشی هەرە گەورەی ئێش و ئازاری گەلەكەمان لەسەر شانی ئافرەتان بووە و ڕۆڵێكی مەزنیان لە خەبات و قوربانیدانی گەلی كوردستاندا هەبووە. هیوادارم ئەو بۆنەیە دەرفەتێك بیت بۆ كەمكردنەوەی ئێش و ئازاری ژنانی كوردستان و چیتر پێشێلبوونی كەرامەت و مافی ئافرەتان نەبینین. پێویستە لەنێو خێزان و ناوەندە پەروەردەیی و كولتوورییەكان و شوێنی كاركردندا مافەكانی ئافرەتان و ژنان مسۆگەر بكرێت و سنوورێكیش بۆ ئەو توندوتیژییە جەستەیی و دەروونییە دابنرێت كە لەدژی ژنان لە ئارادایە.

جارێكی دی پیرۆزباییتان لێ دەكەم و هیوام بەختەوەری و شادیتانە.

مسعود بارزانی
سەرۆكی هەرێمی كوردستان
8ـی مارسی 2014