بۆ جارێكی تر هەڕەشەكردن لە ماڵباتی كورد لە موسڵ لە لایەن گرووپە توندڕەو تیرۆریستەكانەوە درێژەی هەیەو تا دێ كورد موسڵ بەرەو ناوچە دەشتایەكانی ئەو پارێزگایە كۆچ دەكەن.
سەرچاوەیەكی كورد لە ئەنجوومەنی پارێزگای موسڵ رایگەیاند: لە 2 رۆژی رابردوودا 3 ماڵباتی دیكەی كورد كە ماوەی زیاتر لە 30 ساڵە لەو شارە نیشتەجێن بە هۆی هەڕەشەی گرووپە تیرۆریستی و توندڕەوەكانەوە ئەو شارەیان بە جێهێشتووە.
وەك سەرچاوەكە روونیشیكردەوە، ئێستاكە ئەو 3 ماڵباتە لە چەند شوێنێكی جیاوازی دەشتی موسڵ بە شێوەی كاتیی نیشتەجێ كراون و لە بارودۆخێكی خراپدان.
لای خۆیەوە بەشار كیكی سەرۆكی ئەنجومەنی پارێزگای موسڵ ئاماژەی بەوەدا، لەگەڵ كۆچكردنیان لەو ئیدارە ناوچە كوردنیشنانەی كە لێی نیشتەجێ دەبن هاوكاری و كۆمەكیان پێشكەش دەكرێ بۆ ئەوەی دەست بە ژیان و گوزەران بكەنەوە.