ئەنجوومەنی پارێزگای ئەنبار رایگەیاند بەهۆی ئەو رێكارانەی لەم دواییەدا گرتوویانەتەبەر رەوشی ئەنبار ئارامتر بووەتەوە، بەڵام گوتەبێژی هۆزەكانی فەللـوجە دەڵێ پێكدادان لەنێوان سوپا و چەكداران بەردەوامە و ر‌وومادی و فەللـوجە بۆردوومان دەكرێن.

سەباح كەرحوت، سەرۆكی ئەنجوومەنی پارێزگای ئەنبار رایگەیاند: "بەهۆی ئەو رێكارانەی لەم دواییەدا گرتمانە بەر بەتایبەتیش دەستپێشخەرییەكەی ئەم دواییەی پارێزگای ئەنبار ئێستا رەوشی پارێزگاكە كەمێك ئارامە".

كەرحوت گوتیشی: "دەستپێشخەرییەكەی ئەمجارەی پارێزگای ئەنبار لەلایەن سەرۆك هۆز و زانایانی ئاینی شارۆچكەی فەللـوجە پێشوازی لێكراوە بۆ دۆزینەوەی چارەسەرێك كە جێگای رەزامەندی هەموو لایەك بێت، هاوكات داوامان لە ئاوارەكان كردووە بگەڕێنەوە شوێنەكانیان و هەموو ئەو خێزانانەی بەهۆی ئەم دۆخەوەش زیانیان بەركەوتووە لەلایەن حكومەتی عێراق قەرەبوو دەكرێنەوە".

عەبدولرەزاق نایل، گوتەبێژی هۆزەكانی فەللـوجە لەمبارەوە بە تۆڕی میدیایی رووداوی راگەیاند: "شەڕێكی تو‌وند لەنێوان چەكدارانی هۆزەكان و سوپای عێراقی لە ناوچەی مەلعەب لە ئارادایە، شارۆچكەی فەللـوجەش گەمارۆدراوە و بەردەوامیش بۆرد‌وومان دەكرێت، لە ناوچەی گەڕمەش چەكدارانی هۆزەكان بەرپەرچی هێرشێكی سوپای عێراقیان داوەتەوە".

سەبارەت بە دەستپێشخەرییەكەی پارێزگای ئەنباریش نایل گوتی: "تاوەكو بۆردو‌ومانكردنی فەللـوجە رانەگیرێت، دەستپێشخەرییەكەی پارێزگای ئەنبار نرخی نابێت".

بە مەبەستی راوەدو‌ونانی چەكدارانی سەر بە رێكخراوی دەوڵەتی ئیسلامی لە عێراق و شام (داعش) نزیكەی دوو مانگە سوپای عێراقی شارۆچكەی فەللـوجەی گەمارۆداوە، بەڵام تاوەكو ئێستا نەیتوانیوە شارۆچكەكە كۆنترۆڵ بكات.








رووداو