قاعیده‌ به‌ ته‌قینه‌وه‌ ناڕه‌زایی به‌رامبه‌ر ئاسایش ده‌رده‌بڕێ

رێكخراوی تیرۆریستی قاعیده‌ی ئیسلامی به‌هۆی ده‌ستگیركردنی 36 تیرۆریسته‌ كورده‌ گه‌ڕاوه‌كه‌ له‌لایه‌ن ئاسایشی سلێمانییه‌وه‌ هه‌ڕه‌شه‌ له‌و شاره‌ ده‌كات و ته‌قینه‌وه‌كه‌ی شه‌وی رابردووتری ئه‌و شاره‌ش هه‌ڕه‌شه‌یه‌كی راسته‌وخۆی قاعیده‌ بوو وه‌ك تۆڵه‌سه‌ندنه‌وه‌.
له‌ ماوه‌كانی رابردوودا ده‌یان گه‌نجی كورد بۆ كاری تیرۆریستی له‌ شاره‌كانی هه‌رێمی كوردستانه‌وه‌ به‌شێوه‌ی نیمچه‌ ئاشكرا له‌ رێگه‌ی مزگه‌وته‌كان و چه‌ند حزبێكی ئیسلامییه‌وه‌ ره‌وانه‌ی سوریا ده‌كران بۆ چوونه‌ ریزه‌كانی به‌ره‌ی نوسره‌ و كوشتنی كوردانی رۆژئاوای كوردستان به‌نێوی جیهاده‌وه‌، به‌م دواییه‌ش ژماره‌یه‌ك له‌و گه‌نجه‌ كورده‌ تیرۆریستانه‌ گه‌ڕانه‌وه‌ كوردستان و 36 كه‌سیان له‌لایه‌ن ئاسایشه‌وه‌ ده‌ستگیر كراون.
له‌مباره‌وه‌ لاهور شێخ جەنگی سه‌رۆكی دەزگای پاراستن و زانیاریی هەرێمی کوردستان به‌ئاژانسی هەواڵی (واخ)ی عێراقی گوتووه‌ \'تەقینەوەکەی شەوی پێشووتری شاری سلێمانی درێژەپێدەری ئەو 2 تەقینەوەیە بوو کە ماوەیەک لەمەوبەر روویان دا و ئامانج لێی 2 ئەفسەری وەزارەتی پێشمەرگە بوو، ئەو هێرشە تیرۆریستیانەش لەلایەن گرووپە تیرۆریستییەکانی ناو سوریا ئه‌نجام دراوه‌\'.
روونیشی کردەوە \'هێزەکانمان لە چەند رۆژی رابردوودا 36 لەو گەنجانەیان دەستگیر کردووە کە لە سوریا گەڕاونەتەوە و دانیان پێداناوە کە لە پاڵ گرووپی تیرۆریستی نوسرە دژی هێزە کوردییەکان شەڕیان کردووە و مەشقیشیان لەسەر چۆنیەتی شەڕکردن و دانانەوەی بۆمب و هێرشی تیرۆریستی پێكراوه‌\'.
هەروەها گوتی \'گرووپە تیرۆریستییەکان هەڕەشەیان لە سلێمانی و هێزە ئەمنییەکانیان کردبوو بە تۆڵەسەندنەوە بۆ گیراوەکانیان\'.






باسنیوز