پاش تێپه‌ڕبوونی دووساڵ به‌سه‌ر ده‌رچوونی رێنماییه‌كانی تایبه‌ت به‌پێدانی پێشیینه‌ی هاوسه‌رگیری له‌ هه‌رێمی كوردستاندا، خاڵێكی دیكه‌ له‌ رێنماییه‌كان زیاد ده‌كرێت، به‌و پێیه‌ش ئه‌و كه‌سانه‌ی موچه‌خۆری حكومه‌تی هه‌رێمن له‌ ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم و گرێبه‌ستی هاوسه‌رگیرییان له‌ دادگاكانی ده‌ره‌وه‌ی ئیداره‌ی هه‌رێم ئیمزاكردووه‌، له‌و پێشیینه‌یه‌ سودمه‌ند ده‌بن.

به‌پێی رێنمایی ژماره‌ 40ی وه‌زاره‌تی دارایی و ئابووریی هه‌رێم، كه‌ به‌رواری 10/12/2013 ده‌رچووه‌و، وێنه‌یه‌كی ده‌ست (خه‌ندان) كه‌وتووه‌، له‌مه‌ودوا پێدانی پێشینه‌ی هاوسه‌رگیری ئه‌و فه‌رمانبه‌رانه‌ش ده‌گرێته‌وه‌ كه‌ موچه‌خۆری حكومه‌تی هه‌رێمی كوردستانن له‌ ناوچه‌ كوردستانییه‌كانی ده‌ره‌وه‌ی ئیداره‌ی هه‌رێم و گرێبه‌ستی هاوسه‌رگیرییان له‌ دادگاكانی ده‌ره‌وه‌ی ئیداره‌ی هه‌رێم ئیمزاكردووه‌، له‌گه‌ڵ ره‌چاوكردنی سه‌رجه‌م رێنمایی و نوسراوه‌كانی تایبه‌ت به‌م بابه‌ته‌.

نوسراوه‌كه‌، ئیمزای بایز تاڵه‌بانی وه‌زیری دارایی و ئابووری له‌سه‌ره‌و، ئاراسته‌ی گشت وه‌زاره‌ته‌كان و فه‌رمانگه‌كانی نه‌به‌ستراو به‌ وه‌زاره‌ته‌وه‌ كراوه‌، له‌گه‌ڵ ده‌ستپێكردنه‌وه‌ی پێدانی پێشیینه‌ی هاوسه‌رگیری له‌ساڵی داهاتوودا، ده‌چێته‌ بواری جێبه‌جێكردنه‌وه‌.

به‌پێی رێنماییه‌كانی ژماره‌ 19 و 20 و‌ 25ی وه‌زاره‌تی دارایی هه‌رێم، كه‌ ساڵی 2011 ده‌رچوون، پێشینه‌ی هاوسه‌رگیری به‌بڕی پێنج ملیۆن دیناری عیراقی، ده‌درێته‌ ئه‌و هاوڵاتی و فه‌رمانبه‌رانه‌ی كه‌ ژیانی هاوسه‌رێتی پێكده‌هێنن، به‌مه‌رجێك گرێبه‌ستی هاوسه‌رگیرییان له‌ دادگاكانی هه‌رێمی كوردستان ئیمزاكردبێت.

ئه‌م نوسراوه‌ی وه‌زاره‌تی دارایی و ئابووری حكومه‌تی هه‌رێم له‌ كاتێكدا كه‌ هه‌ر به‌ فه‌رمانی ئه‌و وه‌زاره‌ته‌ (دارایی) ته‌واوی سلفه‌و قه‌رزه‌كان به‌ سلفه‌ی هاوسه‌رگیریشه‌وه‌ له‌ دوای 15ی ئه‌م مانگه‌وه‌ راگیراون.