بەفر بارین ئاڵو گۆری بازرگانی و گەشتیاری نێوان كوردستان و ئێرانی پەك خست
سەرۆكی تیمی راماڵینی بەفر لە حاجی ئۆمەران بە ئاژانسی هەواڵی پەیامنێری راگەیاند: لە ئێستادا ئێمە سەرقاڵی راماڵینی بەفرین بۆ كردنەوەی رێگای سەرەكی چۆمان حاجی ئۆمەران، بەڵام بە دەیان كامیۆنی بارهەڵگر لە ناوەراستی رێگاكە چەقیون و بەهۆشیەوە رێگای ئامێرەكانی راماڵینی بەفر گیراوە.
وەك عادل باسی لێوەكرد، لە شەوی رابردوو تاكو ئێستا 80 سانتیمەتر بەفر لە سەر رێگای گشتی راماڵدراوە، بەڵام بەهۆی رێگرتن و پەككەوتنی كامیۆنە بارهەڵگرەكان و خێرا دابارینی بەفرەوە تاكو ئێستا هاموشۆ لە سەر رێگای گشتی هاملتۆن لە نێوان چۆمان حاجی ئۆمەران و گوندو ئاوایەكان نەبۆتەوە.
لای خۆشیەوە بەرێوەبەری شارەدێی حاجی ئۆمەران مەغدید عەریف ئەحمەد بە ئاژانسی هەواڵی پەیامنێری راگەیاند، لەگەڵ ئەوەی تیمەكان بە شێوەی بەردەوام سەرقاڵی راماڵینی بەفرن، بەڵام بەهۆی زۆری رێژەی بەفر كە نزیكەی 80 سانتیمەتر باریوە، لە شەوی رابردووەوە تاكو ئێستا ئاڵو گۆری بازرگانی و گەشتیاری نێوان كوردستان و ئێران پەكی كەوتوە و هەوەها لەو دیو سنوری تەمەرچینی ئێران لە لایەن تیمەكانی ئێرانەوە بەفر رانەماڵدراوە بۆیە چاوەرێ ناكرێت ئەمرۆ لایەنی گەشتیاری و بازرگانی بكەوێتە كار، بۆیە داوا كار بوو لە رێبوارو هاموشۆكاران كە ئەمرۆر سەفەر نەكەن.
لە لایەكی تر، لە ئێستادا رێگای دەیان گوندو ئاوایی دەڤەری باڵەكایەتی پەكی كەوتوەو چاوەرێن كە تیمەكانی راماڵینی بەفر رێگاكانیان لە بەفر رابماڵێت.
