لەپێناو بایەخدانی زیاتر بە بواری تەندروستی و پێشخستنی ئەو كەرتە لەهەرێم، وەزارەتی تەندروستیی حكومەتی هەرێمی كوردستان و وەزارەتی تەندروستیی حكومەتی ئەڵمانیا گرێبەستێكی لێك تێگەیشتنیان واژووكرد.

ئەمرۆ 5-11-2013 لەشاری هەولێر لەمەراسیمی واژووكردنی گرێبەستەكەش وەزیری تەندروستی، د.رێكەوت حمەرەشید، رایگەیاند: وەك هەرێمی كوردستان ئەمرۆ هەنگاوێكی گرنگ لەبواری تەندروستی دەنێین بەو پێیەی هەرێمی كوردستان بووە دەیەم وڵات كە گرێبەست لەگەڵ وەزارەتی تەندروستیی ئەڵمانیا واژوو بكات.


وەزیری تەندروستی، گوتی: كاری داهاتووی هەر دوو وەزارەت هاوكاری و هەماهەنگیە لەبواری تەندروستی بەتایبەت ناردنە دەروەی پزیشكان و كارمەندانی تەندروستی و نەخۆش و راهێنانی كارمەندانی تەندروستی بەئامانجی پێشخستنی كەرتی تەندروستیی هەرێم لەبوارەی جیاكیاكانەوە.


لەبەشێكی‌دیکەی مەراسیمی واژووكردنی گرێبەستەكە، بیركاری وەزیری تەندروستی حكومەتی ئەڵمانیا، تیشكی خستەسەر گرنگی گرێبەستەگە بۆهەرێمی كوردستان لەرێگەی پتەوكردنی كاری هاوبەشی تەندروستی و خزمەت‌كردنی هاووڵاتیانی كوردستان بەباشترین چارەسەری پزیشكی.