بەڕێز مەسعود بارزانی سەرۆكی هەرێمی كوردستان دەڵێت: پێكهێنانی دەوڵەتی كوردی، لە ئەنجامی گفتوگۆوە دەبێت، نەوەك توندوتیژی. لە دیمانەیەكیدا لە گەڵ ئاژانسی فرانس پرێس سەرۆك بارزانی دووپاتی لەوە كردەوە كە ناكرێت پێكهێنانی دەوڵەتی كوردی، لە رێگەی توندوتیژییەوە بێت و داواشی لە كوردەكانی پارچەكانی تر كردووە، كە پشت بە گفتوگۆ ببەستن لە گەڵ ئەو وڵاتانەی كە لەگەڵیاندا دەژین.

سەرۆك بارزانی راشیگەیاند كە مافێكی سروشتیی گەلی كوردە كە دەوڵەتی هەبێت، بەڵام بە دەستخستنی ئەو مافە ناكرێـت، لە رێگەی توندوتیژییەوە بێت و بەڵكو دەبێت بە شێوەیەكی سروشتی بێت و كاتی پێویستیشی پێبدرێت و گوتیشی كێشەی كورد لە هیچ كام لە پارچەكان لە رێگەی توندوتیژییەوە چارەسەر ناكرێت و رونیشیكردەوە كە ئێمە پێمان وایە كە مافی كوردە وەكو هەر كەسانێكی تر بژین و بە مافەكانمان شادبین و بەڵام سەردەمی ئێستا سەردەمی لێك تێگەیشتنە و بۆیە ئێمە هانی گفتوگۆ لە نێوان كوردان و ئەو وڵاتانەی كە كوردیان بە سەردا دابەش بووە دەدەین.

لە بەشێكی دیكەی دیمانەكەیدا، سەرۆك بارزانی ئاشكرای كرد، كە كورد نایەوێت لە سەر حیسابی كەسانی تر، ئامانجەكانی بە دەستبهێنێت و بەڵكو كورد هەمیشە بەشێك بووە لە چارەسەر و بەشداری لە چارەسەری كێشەكان، نەوەك ئاڵۆزتركردنیدا کردووە.

سەبارەت بە بەستنی كۆنگرەی نەتەوەییش كەوا بڕیارە لە ماوەی داهاتوو لە شاری هەولێر سازبكرێت، سەرۆكی هەرێمی كوردستان گووتی: ئامانجی بنچینەیی لە كۆنگرەكەدا بریتییە لە یەكخستنی گوتاری كورد بۆ جیهان و وڵاتانی ناوچەكە و هەروەها ئەو گەلانەی كە كورد لەگەڵیاندا دەژیت و ئەوەشی خستە روو كە گوتاری كۆنگرە گوتارێكی ئاشتیانەیە و درێژكردنی دەستی هاوكاری و برایەتییە و هاوكات توێژینەوەیە لە دۆزینەوەی چارەسەرێكی دیموكراسیانە و ئاشتیانە بۆ دۆزی كورد و دووركەوتنەوە لە توندوتیژی و یەكتر قەبووڵ كردن و دووپاتیشی لەوە كردەوە كە كۆنگرە بریار دەرناكات، بەڵكو لە ستراتیژە گشتییەكان، دەكۆڵێتەوە.