نووسینگەی وتەبێژی پارتی دیموکراتی کوردستان لە روونکردنەوەیەکداسەبارەت بە بابەتێکی ڕۆژنامەی ئاوێنە رایدەگەینێت دابەشکردنی ئاوارەکان بەسەر شارەکانی کوردستاندا ئیش و کاری حکومەتی ھەرێمی کوردستانە و داواش لەھەموولایەک دەکات دڵسوزانە بچن بە پیر ئەم خوشک و برایانەمان و پاڵپشتی حکومەتی ھەرێم بن بۆ ھاوکاریکردنی ئەم خەڵکە.


ئەمەش دەقی روونکردنەوەکەیە ‌

ئەمڕۆ (٢٠ی ئاب) لە ڕۆژنامەی ئاوێنە، و لە چەند میدیاێکی تر باسەکیان ورژاندووە بەو ناونیشانەی کە پارتی تۆڵەکردنەوە لە یەکێتی دەکات لەمەڕ ناردنی ئاوارە لێقەوماوەکانی ڕۆژئاوای کوردستان بۆ پارێزگای سلێمانی، بەداخەوە پەرلەمانتاری یەکێتی ( ئازاد گۆران) بەھەمان مەبەست و بەھەمان ووشە دەربڕینی لەم بابەتە کردووە، ئێمە بۆ ھەموو ڕای گشتی کوردستان و عێراق و جیھان رادەگەینین: کە دابەشکردنی ئاوارەکان بەسەر شارەکانی کوردستاندا ئیش و کاری حکومەتی ھەرێمی کوردستانە.
لێرەدا بە پێی بەدواداچوونی ئێمە کە نزیکەی سی ھەزار ئاوارە لەم ڕۆژانەدا ھاتوونەتە کوردستان، چوار ھەزاریان بەر دھۆک کەوتوون و پێشتریش سەد و شەست و چوار ھەزاری تریان لەوێ نێشتەجێ بوونەتەوە تاکو ئێستا، نزیکەی بیست و دوو ھەزار بەر ھەولێر کەوتوون، تەنھا نزیکەی سێ ھەزار رەوانەی سلێمانی کراون بە پێی رێنەماییەکانی حکومەتی ھەرێم. پێمان باشترە لە جیاتی ئەم لێدوانانە ھەموو ھێزە سیاسیەکان بە جەماوەریانەوە و بە دڵسوزانە بچینە پیر ئەم خوشک و برایانمان و پاڵپشتی حکومەتی ھەرێم بین بۆ ھاوکاریکردنی ئەم خەڵکە لێقەوماوەی خۆمان.

نووسینگەی ووتەبێژی پارتی دیموکراتی کوردستان