بە بۆنەی تێپەڕبوونی 228 ساڵ بەسەر بونیاتنانی شاری سلێمانی خۆشەویستدا، پیرۆزباییەكی گەرم ئاراستەی یەك بە یەكی خەڵكی خۆشەویستی سلێمانی و تێكڕای خەڵكی كوردستان دەكەم.

ئەم یادە پیرۆزە، یادی ئەو رۆڵە گرنگ و مێژووییەیە كە شاری سلێمانی لە خەباتی رزگاریخوازی خەڵكی كوردستان و بزووتنەوەی كوردایەتیدا گێڕاویەتی، یادی تێكڕای ئەو بەرهەمە رۆشنبیری و ئەدەبی و هونەرییە ناوازەیەیە كە لە سلێمانییەوە بەرهەم هاتوون و، بوونەتە ئەستێرەی درەوشاوەی مێژووی رۆشنبیری و هونەرو ئەدەبی كوردی.

شاری سلێمانی، شاری شێخ مەحمودی نەمر و بارزانییە و هەمیشە شانازی بە رۆڵ و كاریگەری سلێمانی دەكەین، لە شۆڕشی مەزنی ئەیلوول و تێكڕای ئەو راپەرین و شۆڕش و بزاوتانەی كە لەپێناو كوردایەتیدا دژ بە زوڵم و ستەم ئەنجام دراون.

ئومێد دەكەم ئەم یادە پیرۆزە ببێتە دەروازەیەك، بۆ خزمەتكردنی زیاتری سلێمانی و پێشكەشكردنی خزمەتگوزاری زیاترو پەرەپێدانی زیاتر بەم شارە خۆشەویستەی كوردستان.