دوێنێ 12-5 له‌كۆبونه‌وه‌ی 11 حزب و لایه‌نی كوردستانی له‌كه‌ركوك كه‌ له‌باره‌گای كۆمه‌ڵی ئیسلامی كوردستان له‌و شاره‌ به‌ڕێوه‌چوو گفتوگۆ له‌باره‌ی یه‌كخستنی هه‌ڵًوێستی حزب و لایه‌نه‌ كوردستانیه‌كانی كه‌ركوك له‌باره‌ی ئه‌نجامدانی هه‌ڵبژاردنی نوێی ئه‌نجومه‌نی پارێزگای كه‌ركوكه‌وه‌ كراو سه‌رجه‌م لایه‌نه‌كانی كوردستان بڕیاریاندا به‌یه‌ك لیست به‌شداری له‌هه‌ڵبژاردنی ئه‌و پارێزگایه‌دا بكه‌ن.
سه‌رچاوه‌یه‌ك له‌په‌یوه‌ندییه‌كانی مه‌ڵبه‌ندی رێكخستنی كه‌ركوكی ی.ن.ك كه‌ به‌شداری كۆبوونه‌وه‌كه‌ی كردوه‌ به‌ PUKmediaی راگه‌یاند: له‌كۆبونه‌وه‌كه‌دا هه‌ڵوێستی ئه‌و 11حزب و لایه‌نه‌ سیاسییه‌ كوردستانیه‌ی كه‌ركوك خراوه‌ته‌ڕوو له‌باره‌ی ئه‌نجامدانی پرۆسه‌ی هه‌ڵبژاردنی ئه‌نجومه‌نی پارێزگای كه‌ركوك و لایه‌نه‌ سیاسییه‌ كوردستانییه‌كانی ئه‌وشاره‌ش یه‌ك هه‌ڵوێست و هاوڕابوون له‌سه‌ر ئه‌نجامدانی هه‌ڵبژاردنی ئه‌نجومه‌نی پارێزگاكه‌.
ئه‌و سه‌رچاوه‌یه‌ وتیشی: هه‌موو لایه‌نه‌كانی كۆبوونه‌وه‌كه‌ كه‌ له‌ یه‌كێتیی نیشتمانیی كوردستان و پارتی دیموكراتی كوردستان و بزوتنه‌وه‌ی گۆڕان و یه‌كگرتوی ئیسلامی و كۆمه‌ڵی ئیسلامی و ژماره‌یه‌ك حزبی تر پێكهاتبوون یه‌ك ده‌نگ بوون له‌سه‌ر ئه‌وه‌ی كورد به‌یه‌ك لیست به‌شداری له‌و هه‌ڵبژاردنه‌دا بكات و هیچ مه‌رجێكی پێشوه‌ختیش له‌پێكهاته‌كانی تره‌وه‌ دیاری نه‌كرێت بۆ ئه‌نجامدانی ئه‌و پرۆسه‌یه‌ بۆ ئه‌وه‌ی سه‌نگ و ره‌نگی هه‌ر پێكهاته‌یه‌ك به‌هه‌قیقه‌تی خۆیه‌وه‌ له‌كه‌ركوك ده‌ربكه‌وێت و دوای هه‌ڵبژاردنه‌كه‌ كورد بیر له‌وه‌بكاته‌وه‌ به‌رژه‌وه‌ندی له‌گه‌ڵ كام لیستی هاوشێوه‌ی یه‌ك ده‌گرێته‌وه‌ تا رێككه‌وتنی سیاسی له‌گه‌ڵ ببه‌ستێت.

به‌وته‌ی سه‌رچاوه‌كه‌ی PUKmedia رۆژی 13-5 كۆبونه‌وه‌یه‌ك له‌لایه‌ن نه‌ته‌وه‌یه‌كگرتوه‌كان له‌كه‌ركوك ساز ده‌كرێت بۆ ئاگاداربونی ئه‌و لایه‌نه‌ له‌بیروبۆچوونی پێكهاته‌كانی كه‌ركوك سه‌باره‌ت به‌هه‌ڵبژاردنی ئه‌نجومه‌نی پارێزگای كه‌ركوك، راشیگه‌یاند: ئێمه‌ له‌و كۆبونه‌وه‌یه‌كدا یه‌ك هه‌ڵویستی كورد به‌رامبه‌ر به‌ئه‌نجامدانی بێ مه‌رج له‌و هه‌ڵبژاردنه‌دا ده‌گه‌یه‌نینه‌ لایه‌نی نه‌ته‌وه‌یه‌كگرتوه‌كان.