سەرۆكی هەرێمی كوردستان لەنامەیەكدا بۆ هاوسەرۆكی كۆنگرەی جڤاكی دیموكرانی KCD ئەحەد تورك، دەڵێ بەهۆی هەندێك هۆكارەوە نەمتوانیوە بەشداری لەنەورۆزی ئامەددا بكەم و هیوا خوازم، نەورۆز ئاشتی بۆ گەلی كورد بگەڕێنێتەوە.

سەرۆك بارزانی لەوەڵامی بانگهێشتەكەیاندا بۆ ئامەد، نامەیەكی ئاراستەی ئەحمەد تورك كردووە و تێیدا رایدەگەیەنێ، كە لەبەر هەندێ هۆكار نەیتوانیوە بەشداری نەورۆزی ئەوشارە بێت.

لەبەشێكی نامەكەدا بارزانی نوسیویەتی: بەدڵی و بەگیان جەژنی نەتەوەیی كوردان، جەژنی نەورۆز پیرۆز دەكەم. هیوادارم كۆنفڕانسی نەتەوەیی بەهاوكاری هەموومان ببێتە هۆكاری دەستەبەركردنی هەموو داواكانی گەلی كورد.

سەرۆك بارزانی لەدرێژەی نامەكەیدا دەڵێ: نەورۆز بەشێكی ناسنامەی نەتەوەییمانە، بووە بە رۆژی ئازادی و رۆژی ئاشتی، بووە بە سیمبولی ئازادی، گەلی كورد لەهەموو شوێنێك لەتێكۆشانی ئازادیدا نەورۆزی بەبنەما وەرگرتووە، لەهەموو شار و ناوچە و گوندەكاندا بە بەشداری هەموو كوردان ئەو رۆژە پیرۆز كراوە.

لەدرێژەی نامەكەیدا، سەرۆكی هەرێم نوسیویەتی: خوازیاربووم لە پیرۆزباییەكانی نەورۆزی ئامەددا بومایە، بەڵام بەهۆی هەندێك هۆكارەوە نەمتوانیوە بەشداری لەنەورۆزی ئامەددا بكەم، بەو بۆنەیەوە داوای لێبوردنی خۆمتان پێ رادەگەیەنم، جارێكی تریش نەورۆزتان پیرۆز دەكەم و خوازیارم ببێتە بۆنەی سەركەوتن.
-خەندان