به‌ بۆنه‌ى یادى 42 ساڵه‌ى رێككه‌وتننامه‌ى مێژوویى 11ى ئادارى ساڵى 1970 و 21 ساڵه‌ى ئازاد كردنى هه‌ولێرى پایته‌خت ده‌زگاى ئه‌یلول له‌ دووتوێى به‌یاننامه‌یه‌كدا پیرۆزبایى ئاراسته‌ى خه‌ڵكى كوردستان به‌گشتى و هه‌ولێرى پایته‌خت كردووه‌ ئه‌م ده‌قه‌كه‌یه‌تى : 42 ساڵ به‌رله‌ئه‌مرۆ بۆیه‌كه‌م جار دان نرا به‌بوونى نه‌ته‌وه‌ى كورد و مافى پێكه‌وه‌ ژیانى هاوبه‌ش له‌گه‌ڵ نه‌توه‌كانى تردا له‌عێراق ، ئه‌ویش له‌ئاكامى شۆرشێكى چه‌ندین ساڵه‌ى سه‌رجه‌م چین و توێژ وكۆمه‌ڵانى خه‌ڵكى كوردستان له‌ژێر چه‌ترى یه‌ك پارت و له‌بازنه‌ى شۆرشى مه‌زنى ئه‌یلولدا ، بێگومان تا ئه‌وكات گه‌وره‌ترین و به‌نرخترین ده‌سكه‌وتى مێژوویى بزاڤى رزگاریخوازى گه‌لى كورد بوو كه‌به‌ خوێنى هه‌زاران شه‌هید و خاپور كردنى وڵاته‌كه‌مان له‌لایه‌ن داگیركه‌ران ، به‌ده‌ستهێنرا ،

هاوكات 21 ساڵ به‌ر له‌ئه‌مرۆ له‌ڕاپه‌ڕینێكى مه‌زنى مێژوویى دا له‌ 11ى ئادارى 1991 هه‌ولێرى پایته‌خت له‌ده‌ستى داگیركه‌ران رزگارى بوو كه‌ له‌ئاكامى یه‌كریزى خه‌ڵكى كوردستان و پاڵپشتى هێزى پێشمه‌رگه‌ى كوردستان هاته‌ده‌ستمان ، دامه‌زراوه‌ شه‌رعى و یاساییه‌كانى ئه‌مرۆى هه‌رێم به‌رى ره‌نج و خه‌باتى ساڵه‌هاى ساڵى سه‌رجه‌م گه‌لى كوردستانه‌ و په‌رله‌مان و حكومه‌تى هه‌رێمیش دوو گوڵى سورى به‌خوێن ئاو دراون كه‌ ئه‌ركى هه‌موو تاكێكى ئه‌م كوردستانه‌یه‌ وه‌كو بیلبیله‌ى چاومان بیپارێزین ، بێگومان له‌ئاكامى كه‌مى ته‌جروبه‌ى ده‌وڵه‌تدارى و ئه‌و كۆسپ و ته‌گه‌رانه‌ى كه‌ دوژمنانى گه‌له‌كه‌ماندروستیان كردووه‌ دیاره‌ شتێكى ئاساییه‌ ئه‌گه‌ر هه‌ندێ كه‌موكوڕى تێدا به‌دى بكرێت ، به‌ڵام گرنگ ئه‌وه‌یه‌ ئه‌م ئه‌زموونه‌ بپارێزرێت و ده‌وڵه‌مه‌ند بكرێت و یه‌كریزى و ته‌بایى خه‌ڵكى كوردستان بپارێزرێت و مافى هه‌موو تاكێكیشه‌ به‌ پێى یاسا ده‌سته‌ به‌ربێت ، هه‌ربه‌م بۆنه‌وه‌ پیرۆزبایى خۆمان ئاراسته‌ى به‌رێزتان و سه‌رجه‌م خه‌ڵكى كوردستان ده‌كه‌ین و رێز بۆ ئیراده‌ى رزگاریخوازى گه‌له‌كه‌مان داده‌نێین ، با یاده‌كانى ئادار بكه‌ین به‌سه‌ره‌تاى رێگاى ئاسوده‌یه‌كى رون به‌م نزیكانه‌ ئینشاڵا كه‌ ئه‌ویش ته‌نها به‌ پاراستنى هێمنى و یه‌ك هه‌ڵوێستى و یه‌كریزیمان به‌ده‌ست دێت .