كوردستانیانی بەڕێز .. هاوڵاتیانی خۆشەویست.. هاوڕێیانی ئازیز

وەك لە پەیامی پێشوو بە ئێوەی بەڕێزم راگەیاند كە كابینەی تازە كار بۆ خزمەتكردنی تەواوی پێكهاتەكانی خەڵكی كوردستان دەكات و بەرژەوەندی هەرێمی كوردستان دەخاتە سەرووی هەموو بەرژەوەندیەكی تر.
ئێستا ئێمە لەسەروبەندی پێكهێنانی كابینەی تازەین. دەبێ‌كابینەی حەفتەم كار بۆ ئەو پرس و بابەتە گرینگانە بكات كە بەشێكن لە ژیانی ئەم گەلەو لە ئایندەدا دەبنە هۆكارێك بۆ ئاسوودەیی و خۆشگوزەرانی و دڵنیایی. ئێمە بە بڕوایەكی بە هێزو تێڕوانینێكی گەشبینانە بە هەماهەنگی لەگەڵ میللەتی خۆمان كاردەكەین.
ئێوە وەك هێزێكی لەبن نەهاتوو هەمیشە داكۆكیتان لە ئازادی و پاراستنی كەڕامەت و خۆشگوزەرانی گەلی كوردستان كردووە، ئێوە قوربانیتان داوەو ئەمڕۆتان دروست كردووە. هەر ئێوەش بوون سەلماندتان كە ناتانەوێ‌پرۆسەی دیموكراسی و گەشەپێدان و سەقامگیری هەرێمی كوردستان سستی تێبكەوێ‌. ئێوە ئێمەن و ئێمەش ئێوە، جەماوەرو دەسەڵات تەواو كەری یەكترن و لە یەك سەرچاوە هەقوڵاون و بۆ یەك ئایندەش دەڕوانن. مەحاڵە بیرو بۆچوونی جیاواز ببێتە هۆكاری لێكترازانی ئەو شیرازە جوانەی كە هەرێمی كوردستان شانازی پێوە دەكات.
بۆیە شادو خۆشحاڵ دەبم ئەگەر ئێوەش لەم لاپەڕەیەدا بیرو بۆچوون و پێشنیارو رەخنەكانتان بخەنەڕوو، من بە سینگێكی فراوان پێشوازی لە هەر جۆرە بیرۆكەو بۆچوونێكی تازە دەكەم. دەمەوێ‌ئێوەش لەگەڵ ئێمە بەشدار بن بۆ چۆنیەتی كاركردن و ئەنجامدانی پڕۆژەو شێوازی پێشكەشكردنی خزمەتگوزاری جۆراو جۆر بۆ هەرێمەكەمان.
لەوانەیە نەتوانم وڵامی هەموو تێبینی و سەرنج و پێشنیارو رەخنەكانتان بدەمەوە، بەڵام حەز دەكەم لەوە دڵنیابن كەوا زۆر بەووردی دیراسەی هەموو بیرو بۆچوونێكی ئێوە دەكەم و بە هەندیان هەڵدەگرم، هاوكات ئێمەش بەدوای بیرۆكەو پێشنیارو بۆچوونی تازەدا دەگەڕێین بۆ ئەوەی لە كابینەی تازەدا بە پشتگیری هاوڵاتیانی بەڕێزی خۆمان كاری لەسەر بكەین.
تكایە راشكاوانە بۆچوونەكانتان بنێرن و دەتوانن بە چاوی رەخنەگرانە سەرنجەكانتان بخەنەڕوو، گرینگ ئەوەیە ئەم كەناڵە دەتوانێ‌هەموومان كۆكاتەوە، هەمووشمان بەیەكەوە دەتوانین باشترین و زۆرترین سوود بە هەرێمی كوردستان بگەیەنین و ئایندەی گەلەكەمان رۆشن بكەین.
ئێوەش هەر شادو سەرفرازبن، لەگەڵ رێزمدا..