دەقی وتەکانی سەرۆکی هەرێم لە کۆنگرەی رەوەندی کوردانی سووریا لە هەولێر
ب ناڤێ خوهدایێ مهزن و دلۆڤان!
خوشك و برایێن خوهشدڤی!
ئامادهبویێن برێز!
هون ههموو ب خێرهاتن سهرچاڤان!
هون هاتنە مالا خوه و وهلاتێ خوه!
ئیرۆ, ههولێرا پایتهختا ههرێما كوردستانێ شاد و سهرفرازه ب ههبوونا وه. هێڤیدارم, كۆنگرهیا وه سهركهفتی به, و ئەو ئارمانجێن كو پێ ناڤێ وان ده ئەڤ كۆنگره هاتیه بهستن, ب جیھ بێن.
مهبهست ل ڤێ كۆنگرهیا رهڤهندا كوردێن رۆژاڤا ل دهرڤه, ژ بۆ وێ هندێ یه دیراسهت و نرخاندنا ئەڤ كاودانێن كو ئیرۆ ل دهڤهرێ ههیه و دهێنه كرن و بریارێن پێویست بێنه داین ژ بۆ خوه ئامادهكرنهك ژ بۆ ههر ئیهتیمالهك.
وهكی كو ئەم دبینین, گوههرتنێن مهزن ل دهڤهرێ روودان, ئەڤه ل سالا بهوریدا و ههتا ئیرۆ, و گوههرتن بهردهوامه و ئەم ل وێ باوهریێ دانه, هیچ دهولهتهك و هیچ هێزهك نهكاریه خوه ل بهر ڤێ گوههرتنێ بگره. ژ بهر وێ یهكێ پێویسته گهلێ كورد ژی, خوه ئاماده بكه ژ بۆ ههر ئیهتیمالهك.
ژ بۆ مه رهوشا سوریه گهلهك گرینگه, یهك ژ بهر وێ هندێیه كو مه سینۆرهكه درێژ پێكڤه ههیه و ئەم جیرانن, دویهم پتر دو ملیۆن كورد ل سوریه دژین, ژ بۆ مه گرینگه ئەو گوههرتنێن كو دهێنه كرن, یان دهێته كرن, كا رهوشا كورد و برایێن مه یێن كورد ل سوریه دێ چاوا به. درێژیا دیرۆكێ مههروم بوونه ژ ههموو ههق و هقوقهكی, مههروم بوونه ژ ههقێ وهلاتیبوونێ ژی, ژ بهر هندێ, مه پێ خوهشه ئامادهكاریهك باش بێته كرن, ژ بۆ وێ هندێ ههر گوههرتنهك كو ببه, ههلبهت لازمه گوههرتنهك ئەرێنی ل رهوشا گهلێ كوردێن سوریه بكه.
ههلبهت گوههرتن نه كارێ مه یه و نه كارێ تو ئالیهكه دنه, كارێ خهلكێ سوریه ب خوه یه. ئەرهب ڤه, ب كورد ڤه و ب ههموو نهتهوهیێن دن ڤه كو ل سوریه دژین. لێ ژ بۆ مه گرینگه و ئەم نكارن تهماشهڤان بین, ژ بۆ مه گرینگه ئەم بزانین ئەڤ گوههرتن چاوا چێدبه.
مه نهڤێت ئەم ب تو ئاوایهكی دهستێ خوه بینین د ناڤ كارێ وه ده, مه دڤێت ئەم ئالیكاریا وه بكین ڤێ دهرفهتێ ژ بۆ وه برهخسێنین بۆ هندێ هون ل وهلاتێ خوه ل پایتهختا خوه ل ههوایهكی ئازادی بریارێن خوه بدن. ههر بریارهكه هون بدن, ئەمێ پشتگریێ ل وێ بریارا وه بكن. لێ تاوسیا مه ژ بۆ وه ئەوه, لازمه ههر بریارهكه كو هون بدن, دور به ژ توندوتژیێ. لازمه رێیا ئاشتی و دهمۆكراتیێ هلبژێرن و رێیا دیالۆگێ بگرن بهر خوه. براستی ئەم نزانن كا رهوشا سوریه دێ چ لێ ببه. لێ ههموو شیرۆڤه ئەون كو دێ گوههرتن ببن, ژ بۆ وێ یهكێ ئەو گوههرتنێن كو دبن, لازمه هون ژی ئامادهبن ژ بۆ ههموو ئیهتیمالهك.
مهرجێ مه ژ بۆ پشتگریا وه ئەوه, یهكرێزیا وهیه, ڤێ فهترهیێ ده كو فهترهیهكه گهلهك گهلهك یا ههستیاره و ههسساسه, لازمه هون خوه دوور بێخن ژ بۆ هزبایهتیا تهسك و تهنگ. ههتا رهوشا سوریه دیار ببه, كوردایهتیهكه بهرفرەھ بكن, هون ههموو, ل بن چهترا كوردایهتیێ ده كار بكن, رێز و ئیهتیرام ژ بۆ هزبایهتیێ و هزبێن وه و ژ بۆ وه ههموویان, لێ ب هزبایهتیا تهسك و تهنگ هونێ ڤێ دهرفهتێ ژ دهست بدن و ئەم ژی نكارین تشتهكی ژ بۆ وه بكین. ژ بهر وێ یهكێ جارهكه دن وهكی برایهكی وه وهكی كوردهك, هێڤیا من ئەوه ههتا رهوشا سوریه دیار ببه, خوه ژ هزبایهتیا تهنگ دوور بێخن و خیلافاتێن ناڤخۆ ههموویان ب جیھ بهێلن, بهرهڤ پاشارۆژهكه رهوشهن بچن و ئەم د وێ باوهریێ دا نه ب هێڤیا خوهدێ دێ دهستكهفتێن مهزن ژ بۆ وه ژی بدهست بێن.
ههر ب ڤێ ههلكهفتێ من دڤێت بالبكشینم ل سهر وێ یهكێ كو ههر د ڤێ سالێ ده ئەمێ كۆنگرهیهكه بهرفرهھ یا ههموو هێزێن كوردستانی ل ههر ڤی جهی ئەنجام بدین و مهبهست ژی ئەوه ئەم یهك خیتابا كوردستانی بهلاڤ بكین بۆ وان ههموو مڵهتێن كو ئەم پێكڤه دژین, بۆ جیهانێ ژی, ئەم مڵهتهكی ئاشتیخوازین, د دیرۆكێ ده خهدرهكه مهزن ل ڤی نهتهوهیی هاتیه كرن, ئەم تێدگهین كو ئیرۆ ئەم چ راستیهكه دهنه, و نه مومكونه ئەم دهڤ ژ خهباتا خوه بهردن لێ خهباتهكه ئاشتیانه و خهباتهكه دهمۆكراتیك خهباتهكه ب دیالۆگێ. ئەو زهمان چوو ئینكارا ههبوونا كورد بێته كرن, زهمانێ چهكێ ژی چوو. ئیرۆ زهمانێ مانتقه, زهمانێ ئاشتیه, زهمانێ دهمۆكراتیهتێیه, زهمانێ پێكڤهژیانێیه, زهمانێ رووپهلهكه نوو یه ل ناڤبهرا مڵهتان ده.
مهبهستا مه ژ ڤێ كۆنگرهیێ ئەوه ئەم دهستێ برایهتیێ و ئاشتیێ درێژبكن بۆ برایێن مه یێن ئەرهب و تورك و فارس ژ بۆ جیهانێ ژی ببێژین, ئەم مڵهتهكی ئاشتیخوازین, نه ب شهر و چهك, بهلكو ب مانتق و ب ئاوایهكه ئاشتی ئەمێ بهردهوامبین ل سهر خهباتا خوه و داخوازا مافێن خوه بكن.
من نهڤێت ئەز زێدهتر دهما وه بگرم, جارهكه دن هون ههموو بخێرهاتن, سهرچاڤان, هون هاتنه مالا خوه, هون هاتنه ناڤ كهسوكارێن خوه, هێڤیا سهركهفتنێ ژ بۆ كۆنگرهیا وه دخوازم و هون ههر بژین, و ههر بژین بۆ كورد و كوردستان.
