بە ناوی خوای مەزن و دلۆڤان

جارێكی دیكە تۆپخانەكانی سوپای كۆماری ئیسلامی ئیران دەستیان بە بۆردمانكردنی ناوچە سنووریەكانی هەرێمی كوردستانی عیراقیان كردووە كە بە هۆیەوە زەرەر و زیانی گەیاندۆتە گوندنشین و جوتیاران و ئاژەڵداران و خەڵكی سیڤیلی ئەو ناوچانە ، هەروەها بە هۆی توندی و چری ئەو بۆردومانانە ژمارەیەك لە هاوڵاتیان ئاوارەبون و ناچاركراون لە بەر مەترسی گیان شوێنی نیشتەجێبوونیان جێبهێلن ، لە هەمان كاتدا بەردەوامی ئەو كردەوانە رەوشی ئەو ناوچانەی بە گشتی دووچاری پشێوی كردووە.

ئێمە لە كاتێكدا پرۆتستۆی ئەو بوردومانە عەشواییانە دەكەین بۆ سەر هاوڵاتیان و ناوچە سنورییەكانی هەرێم و بە كارێكی نابەجێیان دادەنێین ، پێمان وایە كە ئەو جۆرە كارانە زیان بە پەیوەندی نێوان هەرێم و كۆماری ئیسلامی ئێران دەگەیەنێت و هیچ پاساوێكیش بۆ ئەو بۆردومانە عەشواییە نییە و لە بری دروستكردنی ترس و نیگەرانی هەوڵ بدرێت بە رێگەی دیالۆگ كێشەو گیروگرفتەكان رێگە چارەی گونجاویان بۆ بدۆزرێتەوە و هەموو لایەك بگەنە ئەو بروایەی كە بە توندوتیژی و بۆردومان كردن هیچ ئامانجێك نایەتەدی.


مسعود بارزانی
سەرۆكی هەرێمی كوردستان
2/7/2011