ئەمرۆ چوارشەممە 18/5/2011 بەرێز مسعود بارزانی سەرۆكی ھەرێمی كوردستان لە سەڵاحەدین پێشوازیكرد لە بەرێز ئاد مێلكەرت نوێنەری تایبەتی ئەمینداری گشتی un لە عیراق و شاندێكی یاوەری.

لە دیدارێكدا ، هەر دوولا بیروبۆچوونیان ئاڵوگۆڕكرد سەبارەت بە كۆمەڵێ‌ پرسی گرنگ كە پەیوەستن بە رەوشی ئەمرۆی عیراق و هەنگاوەكانی تەواوكردنی پێكهاتەی حكومەتی فیدراڵ و دیاریكردنی وەزیرانی پۆستە وەزارییە ئەمنییەكان و ئەنجومەنی باڵای سیاسەتە ستراتیژییەكان و هەر دوولا تەئكیدیان كردەوە لەسەر پەلەكردن لەو كارانە لە پێناو هاتنەكایەی حكومەتێكی فیدراڵ كە ئەركەكانی راپەڕێنێت و بەرنامەكانی بێنێتەدی.

هەر لەو دیدارەدا ، پرۆسەی تایبەت بە جێبەجێكردنی ماددەی 140 و كاری ئایندەی یۆنامی سەبارەت بەو پرۆسەیە و هەروا پرسی مانەوەی هێزەكانی ئەمەریكا پاش ساڵی 2011 و پرسی پاراستنی ئەمنیەتی ناوچە دابڕێندراوەكان لە لایەن هێزەكانی هاوبەشەوە تاوتوێكران و لەم رووەوە تەئكید لەسەر زیاتر چەسپاندنی هێمنی و ئارامی و چارەسەركردنی كێشەكانی ئەو ناوچانەكرایەوە بە پێی دەستوور .